धरान, ३ जेठ । अन्तर्राष्ट्रिय परदेशी साहित्यिक समूहको नियमित प्रकाशन “परदेशी बिम्बहरू… साहित्यिक वार्षिक” वर्ष १६ अङ्क १६ साथै कवि भीम विरही राईद्वारा लिखित “बारुदले कोरेका अक्षरहरू” कविता सङ्ग्रह होटल रत्न इन धरानमा लोकार्पण भएको छ ।
प्रा.डा. टङ्कप्रसाद न्यौपाने प्रमुख अतिथि रहेको उक्त कार्यक्रममा वरिष्ठ साहित्यकार, समाजसेवी तथा सिक्किम सरकारका प्रवक्ता सि.पी. शर्मा र नेपाल संस्कृत विश्वविद्यालयका पूर्व उपकुलपति तथा शिक्षाध्यक्ष प्रा.डा. भीम खतिवडा विशिष्ट अतिथि रहेका थियो ।
कार्यक्रममा भीमबहादुर स्मृति प्रतिष्ठानद्वारा हरेक वर्ष प्रदान गरिँदै आएको पुरस्कार र सम्मान पनि समर्पण गरिएको थियो । पुरस्कार तर्फ अमेरिकामा रहेर नेपाली भाषा साहित्यको सेवा गरिरहेका लेखक साहित्यकार तथा गीतकार डा. नारद पोखरेललाई कीर्तिशेष भीमबहादुर लिम्बुको धर्मपत्नी देशमाया लिम्बु, प्रमुख अतिथि र विशिष्ट अतिथिहरूको हातबाट संयुक्त रुपमा प्रदान गरियो । त्यसैगरी सम्मान तर्फ वरिष्ठ साहित्यकार तथा सिक्किम सरकारका प्रवक्ता सि.पी. शर्माज्यूलाई भीमबहादुर स्मृति सम्मान २०८२ ले विभूषित गरिएको थियो ।
लोकार्पण भएको पुस्तक परदेशी बिम्बहरूमाथि चर्चित कवि तथा लेखक सुदीप पाख्रिन बोलेका थिए भने बारुदले कोरेका अक्षरहरू कविता सङ्ग्रहमाथि कवि समिक्षक देवान किरातीले बोल्नु भएको थियो ।
अन्तर्राष्ट्रिय परदेशी साहित्यिक समूहद्वारा आयोजना गरिएको उक्त कार्यक्रममा प्रा.डा. भीम खतिवडा, सि.पी. शर्मा, प्रा.डा. टङ्कप्रसाद न्यौपाने आदिको महत्वपूर्ण मन्तव्य रहेको थियो ।
कार्यक्रममा कवि वर्षा भण्डारी, कवि टीका आत्रेय, कवि तीर्थ विश्वकर्मा, कवि जमा वाम्बुले राई लिम्बु, कवि आइतु ग्याबा तामाङ, कवि जेबी निकुन्त, सिक्किमका कवि गणेश भट्टराई, कवि विश्वजीत चाम्लिङ्ग आदिले कविता वाचन गरेका थिए ।
समूहका अध्यक्ष सुरेन्द्र लिम्बू परदेशीको सभापतित्व रहेको उक्त कार्यक्रममा उपाध्यक्ष भीम विरही राईको स्वागत मन्तव्य रहेको थियो भने कार्यक्रमलाई सचिव बुद्धी तेम्बे माइलाले सञ्चालन गरेका थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
