ताप्लेजुङ । प्रर्यटन प्रवद्र्धन तथा जलवायु परिवर्तनको असरबारे सचेतना जगाउने उद्देष्यले सिरीजंघा गाउँपालिका, ताप्लेजुङद्धारा आयोजित सिरीजंघा पर्यटन महोत्सव २ं०८२ भव्य रूपमा सम्पन्न भएको छ ।
महोत्सवको प्रमुख आर्कषणको रूपमा समुद्र सतहबाट ३३ सय ७ मिटरको उचाइमा रहेको कञ्चनजंघा साहसिक पदमार्गको नयाँ झोरनीमा आयोजित कञ्चनजंघा साहसिक हाफ म्याराथन प्रतियोगितामा सोलुखम्बुका अर्जुन कुलुङ प्रथम, जुम्लाका धीरज बुढा द्धितिय र ताप्लेजुङका विभिषण लिम्बूले तेस्रो स्थान हासिल गर्न सफल भए ।
विजेता कुलुङलाई २ लाख ८ हजार ५ सय ८६ रूपैयाँ, उपविजेता बुढालाई १ लाख ८ हजार ५ सय ८६ रूपैयाँ र तेस्रो हुने लिम्बूलाई ५८ हजार ५ सय ८६ रूपैयाँ नगद पुरस्कार, प्रमाणपत्र र ट्रफीसहित प्रदान गरिएको थियो ।
हाफ म्याराथनमा चौथोदेखि उत्कृष्ठ दसभित्र पर्न सफल धावकहरुले सान्त्वना पुरस्कारस्वरूप ८ हजार ५ सय ८६ रूपैयाँ नगद पुरस्कार र प्रमाणपत्र प्राप्त गरे । विजेता खेलाडीहरुलाई कार्यक्रमका प्रमुख अतिथि कोशी प्रदेशमा उद्योग, कृषि तथा सहकारी मन्त्री खगेनसिं हाङ्गाम, नेपाली कांग्रेस ताप्लेजुङ जिल्ला सभापति गजेन्द्र तुम्याहाङ, नेकपा एमाले ताप्लेजुङ जिल्ला सचिव सन्तोष चाम्लिङ, सिरीजंघा गाउँपालिकाका अध्यक्ष लालकृष्ण चौहान, उपाध्यक्ष डा. चित्र मावो, प्रमुख प्रशासकिय अधिकृत डम्बरबहादुर आङदेम्बेसहित स्थानीय जनप्रतिनिधिहरुले नगद पुरस्कार, ट्रफी र प्रमाणपत्र हस्तान्तरण गरेका थिए ।
सिरीजंघा गाउँपालिकाकै वडा नंं. ८ मा पर्ने विश्वको तेस्रो तथा नेपालको दोस्रो सर्वोच्च शिखर कञ्चनजंघाको उचाई ८,५८६ मिटरलाई प्रतिविम्वित गर्ने गरि नगद पुरस्कार राशीहरु निर्धारण गरिएको पालिकाका उपाध्यक्ष तथा सिरीजङ्घा पर्यटन महोत्सव सचिवालय समितिका संयोजक डा. चित्र मावोले जानकारी दिए ।
महोत्सवको अन्तीम दिन चौरी प्रवद्र्धन तथा प्रर्दशन कार्यक्रममा स्थानीय राजेश गुरुङको चौरी “मिक्टा”लाई उत्कृष्ठ चौरीका रूपमा २८ हजार ५ सय ८६ रूपैयाँसहित पुरस्कृत गरिएको थियो भने अन्य ३ जना किसानका चौरीलाई सान्त्वना पुरस्कारस्वरूप जनही ८ हजार ५ सय ८६ रूपैयाँ नगद पुरस्कारसहित सम्मानीत गरिएको थियो ।
कवि तथा कलाकारको साथमा सांस्कृतिक साँझ
कार्यक्रमको अन्तिम दिन सांस्कृतिक साँझ भएको थियो । चर्चित गायक तथा संगीतकार ताराप्रकाश लिम्बू, गायकहरु भीम लिम्बू, गोविन्द लिम्बू र प्रीति वेघाले आफ्ना चर्चित गीतहरु गाएर कार्यक्रमलाई मनोरञ्जन तुल्याएका थिए । त्यसैगरी कविहरु नवराज पराजुली, प्रकाश थाम्सुहाङ र देवेन्द्र खापुङले सांस्कृतिक साँझमा आफ्ना रचना सुनाएका थिए ।
गत वैशाख १३ देखि १५ गतेसम्म पहिलो पटक आयोजना गरिएको सिरीजंघा पर्यटन महोत्सवलाई आगामी बर्षमा पनि निरन्तरता दिने गाउँपलिकाले निर्णय गरेको अध्यक्ष लालकृष्ण चौहानले जानकारी दिएका छन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
