काठमाडौं । आगामी बैशाख १३ देखि १५ गतेसम्म सिरीजंघा गाउँपालिका, ताप्लेजुङले आयोजना गर्न गइरहेको सिरीजंघा पर्यटन महोत्सव २०८२ को लोबुचे हिमाल र कालापत्थर क्षेत्रबाट प्रचार गर्दै सहभागिताका लागि आव्हान गरिएको छ ।
समुन्द्र सतहबाट ६ हजार १ सय १९ मिटरको उचाईमा रहेको लोबुचे हिमालबाट सिरीजंघा पर्यटन महोत्सव २०८२ लेखिएको व्यानर प्रर्दशन गर्दै आरोही अमीर राईले भनेका छन्, “कंचनक्षेत्रमा आगामी बैशाख १३ देखि १५ गतेसम्म हुने सिरीजंघा पर्यटन महोत्सवमा हामी हार्दिक स्वागत तथा आमन्तण गर्न चाहन्छौं ।” यसअघि अमिर राईसंगै मनोज वस्नेतले विश्वको सर्वोच्च शिखर सगरमाथाको आधार शिविरको रुपमा रहेको कालापत्थर क्षेत्रबाट पनि उक्त महोत्सवको प्रचार गर्दै सिरीजंघा पर्यटन महोत्सवमा सहभागिताका लागि आव्हान गरेका थिए । कालापत्थर क्षेत्र ५ हजार २ सय ४२ मिटरको उचाईमा अवस्थित छ ।
विश्वको तेस्रो सर्वोच्च शिखर कंचनजंघा हिमश्रृखला अवलोकन गर्दै कंचनजंघा साहसिक पदमार्गको नयाँ झोरेनीमा आयोजना हुने सिरीजंघा पर्यटन महोत्सवअन्तर्गत कंचनजंघा साहसिक पदमार्ग अवलोकन, जलवायु परिवर्तनको स्थलगत अध्ययन, कंचनजंघा साहसिक हाफ म्याराथन प्रतियोगिता २०८२, चौरी, याक प्रवर्द्धन तथा प्रदर्शन, माउण्टेन साइकिलिङ, कला, साहित्य तथा संगीत कार्यक्रमहरु आयोजना हुनेछन् ।
२०८२ साल बैशाख १५ गते हुने हाफ म्याराथनका लागि समुन्द्र सतहबाट ३३ सय मिटरको उचाइमा अवस्थित नयाँ झोरनीबाट ४३०० मिटरको उचाइमा रहेको कस्तुरे ओडारसम्मको दूरी रहनेछ भने सहभागिताका लागि इच्छुक धावकहरुले बैशाख १३ गते दिउँसो १ बजेसम्म आफ्नो निवेदन सम्पर्क व्यक्तिहरु वा पालिकाको इमेलमा पठाइसक्नुपर्ने आयोजकले बताएका छन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
