स्वर्णिम साहित्य समाज बराहक्षेत्र-३, सुनसरीले आयोजना गर्दैआएको ‘स्कुलमा कविता’ प्रतियोगितात्मक कार्यक्रमको दोस्रो संस्करण यही २०८१ माघ ५ गतेबाट हुने भएको छ ।
स्वर्णिम साहित्य समाजको आधिकारिक फेसबुक पेजमार्फत हिजो सो जानकारी गराइएको हो । सो जानकारी अनुसार यो संस्करणमा कक्षा ६ देखि कक्षा -१० सम्मका विद्यार्थीहरुले सहभागी जनाउन पाउनेछन् । यो प्रतियोगितात्मक कार्यक्रममा बराहक्षेत्र नगरपालिकाभरिका विद्यालयका विद्यार्थीहरुले सहभागी जनाउन पाउनेछन् भने साविक गाविसहरु भरौल, बराहक्षेत्र, महेन्द्रनगर, प्रकाशपुर र मधुवनबाट २/२ जना विद्यार्थीहरुलाई फाइनल राउण्डमा प्रवेश गराइने छ ।
फाइनलमा उत्कृष्ट १० बाट विजेता घोषणा गरिनेछ । विजेताले नगद रु. १०,०००/- आकर्षक ट्रफी, प्रमाणपत्र लगायतका पुरस्कार प्राप्त गर्नेछन् भने दोस्रो तेस्रो र सान्त्वनाले क्रमशः ५ हजार, ३ हजार, र २ हजार रुपैयाँको साथमा अन्य आकर्षक पुरस्कार प्राप्त गर्नेछन् । यस्तै अडिसन राउण्डमा स्थानीय स्तरमा ख्याति कमाएका कवि तथा नेपाली भाषाका प्रवुध्व व्यक्तिहरु निर्णायक रहनेछन् भने प्रत्येक स्थानमा अतिथि निर्णायकसमेत रहनेछन् । फाइनलमा भने देशकै ख्यातिप्राप्त कविहरु निर्णायक रहनेछन् । साथै फाइनलमा कविले लाइभ अर्थात प्रत्यक्ष स्थलगत कविता समेत लेख्नुपर्ने जानकारी गराइएको छ ।
समाजका अध्यक्ष प्रकाश दिप्साली राई र सचिव लक्ष्मण कटुवालद्वारा हस्ताक्षर गरिएको सो जानकारी पत्रमा अडिसन राउण्डका निर्णायकहरुलाई आगामी माघ १ गते सार्वजनिक गरिने समेत जनाइएको छ । कार्यक्रम स्थलहरु भने केही फेरबदल हुन सक्ने समाजका अध्यक्ष प्रकाश दिप्प्साली राईले जनाएका छन् ।
स्मरणीय छ ‘स्कुलमा कविता’को पहिलो संस्करणको विजेता बसन्तऋतु मा.वि.बराहक्षेत्र -७ का आर्यन निरौला हुन् भने द्वितीय स्काइ इङ्लिस स्कुल बराहक्षेत्र-३, नडाहाका पुष्पा घिमिरे, तृतीय राजाबास सेकेन्डरी स्कुल बराहक्षेत्र-९ कि सुस्मिता खत्री र सान्त्वना मुनविम एकेडेमी बराहक्षेत्र -५ कि इसा सुवेदी रहेकी थिइन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
