दमक । जनता समाजवादी पार्टी, नेपालको झापा जिल्ला समिति पुनगर्ठन भएको छ ।
बुधबार झापाको दमकमा आयोजित जिल्ला पुनर्गठन कार्यक्रमबाट नयाँ कार्य समिति गठन भएको हो ।
शत्रुधन चौधरीको अध्यक्षतामा पुनर्गठित कार्य समितिका उपाध्यक्षद्वयमा रविलाल ताजपुरिया र साबित्रीकुमारी राजवंशी छन् । त्यस्तै सचिवमा विष्णु महतो, उप–सचिवमा आकाश लावती र कोषाध्यक्षमा नूतन झा छन् ।
पुनर्गठित समितिका सदस्यहरुमा क्रमशः लुखीराम मुर्मु, जितबहादुर राई, राजेन्द्र दियाली, राजेश राजवंशी, रञ्जना ढुङ्गाना, गुणराज राई, गोपाल ताजपुरिया र जयनारायण राजवंशी छन् ।
अशोक राई समूह जसपा नेपालबाट बाहिरिएपछि झापामा जिल्ला अध्यक्षसहित केही पदाधिकारी रिक्त रहेको थियो । ‘पहिचान र सङ्घीयताको आन्दोलनबाट उहाँहरु (अशोक राई समूह) भाग्नु भो । आन्दोलनमा निरन्तर पार्टी स्थापनाकालदेखि लागिरहेका हामीले संगठन र आन्दोलनालई थप उचाईमा पुर्याउने लक्ष्यका साथ जिल्ला समिति पुनर्गठनमार्फत पार्टी गतिविधि अगाडि बढाउने र झापामा ‘जनतासँग जसपा नेपाल अभियान सफल बनाउने कार्य प्रारम्भ गरेका हौँ’, जसपा नेपालका केन्द्रीय सदस्य धिरने सुब्बा लावतीले भने ।
बुधबारको कार्यक्रममा प्रमुख अतिथिको आसनबाट बोल्दै जसपा नेपालका केन्द्रीय कार्यकारिणी समिति सदस्य जयराम यादवले पार्टीका धोकेबाजहरुलाई कुनै स्थान नरहेको जिकिर गरे । ‘बिगतमा गल्ती गर्नेहरु पार्टी छाडेर गैसके । अब पछाडि फर्केर उनीहरुको आलोचना गरेर बस्ने समय छैन । पार्टीको निर्दिष्ट लक्ष्य र उद्देश्य प्राप्तिमा हामी सबैको ध्यान जानु पर्छ ।’
कार्यक्रममा बोल्दै जसपा नेपालका प्रदेश १ अध्यक्ष दिपक याक्खाले अशोक राई समूह समाजवाद प्राप्तिको क्रान्ति र पहिचान, सङ्घीताको लडाँइबाट भागेको आरोप लगाए ।
वक्ताका रूपमा रहेका जसपा नेपालका केन्द्रीय सदस्य लोकसागर साम्बाले लिम्बुवान, जनमुक्तिलगायत पहिचान र सङ्घीयताको निम्ति राजनीतिक आन्दोलनमा रहेका स–साना शक्तिहरुलाई आफूमा समाहित गरेर अगाडि बढ्न सक्दा मात्रै जसपा नेपालको आन्दोलन सशक्त हुने सुझाव दिएका थिए ।
कार्यक्रममा जसपा नेपाल प्रदेश १ का मुख्यसचिव घनश्याम कट्वाल, केन्द्रीय सदस्य रङ्गलाला राजवंशी, प्रदेश १ सदस्य पदमकुमारी लिम्बू, लिम्बुवान राष्ट्रिय समितिका उपाध्यक्ष ओममाया आङ्देम्बेले शुभकामना व्यक्त गरेका थिए ।
जसपा नेपाल केन्द्रीय सदस्य धिरेन सुब्बा लावतीको अध्यक्षतामा सम्पन्न पुनर्गठन कार्यक्रममा मधेश राष्ट्रिय समितिका अध्यक्ष तुलसीप्रसाद राजवंशीको सञ्चालन रहेको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
