सुनसरी, ६ असोज । स्वर्णिम साहित्य समाज, वराहक्षेत्र ३ नडाहाले शनिबार पाँचौ वार्षिक साधारणसभाको अवसर पारेर सर्जक सम्मान, मातृभाषामा कविता वाचन कार्यक्रमको आयोजना गरेको छ ।
नियमित लेखन र ढुंगामा कला भर्दै आएकी चतराका दीपा मगरातीलाई सम्मान भएको थियो । सम्मान ग्रहणपश्चात चतरा साहित्य समाजकी अध्यक्षसमेत रहेकी दीपा मग्रातीले साहित्यमा लाग्नको लागि परिवारले दिएको हौसला र वराहक्षेत्रमा रहेका अग्रजहरूको मायाले अगाडि बढ्न सहयोग पुगेकी बताइन् ।
मातृभाषामा कवि र कविताहरू विषयक कार्यक्रममा कवि छविलाल चौधरी, मित्रराज राई, शुक्र आङ्देम्बे आँशु र पुष्पा बोगटीले क्रमशः थारु, बान्तवा, लिम्बू र नेपाली भाषामा कविता प्रस्तुत गरेका थिए । प्रस्तुत कविताहरूमाथि वराहक्षेत्रकै कविद्वय देवेन्द्र खापुङ र प्रह्लाद पहरेदारले टिप्पणी गरेका थिए ।
टिप्पणी गर्दै कवि खापुङले नेपालमा नेपालीबाहेक अन्य भाषाहरूलाई दमन गरिएको इतिहास कोट्याएका थिए । हजार वर्षअगाडिदेखि नै विद्यापतिकालिन मैथली साहित्य, लिच्छवीकालिन नेवारी साहित्यदेखि ४ सय वर्ष अगाडिदेखि लिम्बू भाषामा साहित्यको प्रादुर्भाव भएपनि वि.सं. १८७१ मा जन्मिएर रामायणलाई नेपाली भाषामा अनुवाद गर्ने भानुभक्त आचार्यलाई आदिकवि मान्नुपर्ने विडम्बना रहेको बताएका थिए । कवि प्रह्लाद पहरेदारले नेपालमा रहेका सबै भाषाभाषीको साहित्यलाई फल्न र फुल्न दिइनुपर्ने, त्यसले फरक सुगन्ध दिने बताएका थिए ।
मातृभाषामा कवि र कविताहरू विषयक कार्यक्रमलाई कवि छविना लुङ्गेली मगरले सहजीकरण गरेकी थिइन् । कार्यक्रममा बालप्रतिभा दीपशिखा दर्नाल र राजेश परियारले सांस्कृतिक प्रस्तुति दिएर कार्यक्रमलाई मनोरञ्जन दिलाएका थिए ।
वराहक्षेत्र नगरपालिका वडा नं. ७ का वडाध्यक्ष कपिल आचार्यले संस्थाको आजिवन सदस्यता लिने र नगरपालिकाको तर्फबाट आर्थिक सहयोग प्रदान गर्ने प्रतिवद्धता जनाएका थिए । त्यसैगरी नेपाल प्रज्ञा प्रतिष्ठानका मातृभाषा विभागका सदस्य हेनसेन याक्खाले संस्थाको काम हेरेर आफूलाई समेत जोश आएको बताइन् । कार्यक्रममा वडा नं ५ का वडाध्यक्ष रोहित काफ्ले, सप्तकोशी बहुमुखी क्याम्पसमा लेक्चरल रमेश काफ्ले, कवि पराजित पोमू, नेपाल पत्रकार महासंघका केन्द्रीय सदस्य भिषण राई, केस्राकार दिलिप राई सगर, कवि समिक्षा छिलिङ राईलगायतको उपस्थिति रहेको थियो ।
समाजका कोषाध्यक्ष शारदा निरौला सारुले संस्थाको आर्थिक प्रतिवेदन र अध्यक्ष प्रकाश दिप्साली राईले प्रगति प्रतिवेदन पेश गरेका थिए । त्यसैगरी संस्थामा आजिवन सदस्यता लिएका ममता घिमिरे, नयाँ सदस्यता लिएका समिर राजवंशी र वर्षा भण्डारीलाई प्रमाणपत्र र टिसर्ट प्रदान गरिएको थियो ।
वराहक्षेत्र नगरपालिका वडा नंं. ३ को कार्यालयमा भएको कार्यक्रममा वडाध्यक्ष राजदीप लामा प्रमुख अतिथि रहेका थिए । कार्यक्रमलाई समाजकी सहसचिव सविता फागो चोङबाङले सञ्चालन गरेकी थिइन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
