इटहरी । सगरमाथा साहित्य प्रतिष्ठान प्रदेश शाखाले दाजु गुरुङको नविनतम कृति ‘निरजोया’ माथिको परिचर्चा र प्रतिनिधि रचना वाचन कार्यक्रममा इटहरीमा शनिबार सम्पन्न भएको छ ।
इटहरीस्थीत दुर्गा पार्टी प्यालेसमा सम्पन्न कार्यक्रममा पत्रकार भोजराज श्रेष्ठ, डा.दिवाकर रेग्मी र बाबुराम खड्काले पुस्तकमाथि आफ्ना धारणा राखेका थिए । पुस्तकले मलेसिया गएर घर परिवार बिर्सेको व्यक्तिमाथि चित्रण गरेको कथा बोलेको र वैदेशिक रोजगारीमा रहँदा हुने दुःख हैरानीलाई समेटेको वक्ताहरुको भनाई थियो ।
कार्यक्रमका प्रमुख अतिथि प्रा.डा. टङ्कप्रसाद न्यौपानेले डायास्पोरा ३ प्रकारको हुने बताएका थिए । ओल्ड डायस्पोरा, न्यू डायास्पोरा र लेवर डायास्पोरा रहेको बताउँदै वैदेशिक रोजगारीमा जाँदाको अनुभूतिलाई समेटिएर लेखिने साहित्यलाई लेवर डायास्पोरा रहेको बताएका थिए ।
सगरमाथा साहित्य प्रतिष्ठान, प्रदेश शाखाका सहसचिव अभिमन्यु अभिजित र सगरमाथा साहित्य प्रतिष्ठानका संस्थापक अध्यक्ष तथा वर्तमान केन्द्रीय कमिटी संरक्षक विवेक दुलाल क्षेत्री, नेपाल शाखा संरक्षक जीपी तिवारीले संस्थाको स्थापना र गतिविधिबारे जानकारी गराएका थिए ।
महेन्द्र बहुमुखी क्याम्पस, धरानका स्ववियू सभापतिसमेत बनिसकेका दाजु गुरुङ वरुण बहुमुखी क्याम्पस, संखुवासभाका क्याम्पस प्रमुख भइसकेका हुन् भने पछिल्लो समयमा हङकङमा रहेर साहित्य लेख्दै आएका छन् । उनको टाँकी फूलहरु (कथा सङ्ग्रह), लाइसी (कथासङ्ग्रह) प्रकाशन भएका छन् । निरजोया पछिल्लो कृति हो भने उपन्यासको रुपमा पहिलो हो ।
रचना बाचन पनि रहेको कार्यक्रममा कवि देवान किराती, कविता केसरी, पदमकुमार लुङ्गेली, नयन अधिकारी, रगेन्द्र कोइरालाले आफ्ना रचना सुनाएका थिए । त्यसैगरी साहित्यकार सुविद गुरागाइँले इटहरीको साहित्यिक पृष्ठभूमिबारे संक्षेपमा बताएका थिए ।
कार्यक्रम कोशी प्रदेश कमिटीका अध्यक्ष मिश्रा गुरुङको सभापतित्वमा सम्पन्न भएको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
