जनकपुरधाम, २६ जेठ । जनता समाजवादी पार्टी नेपाल (जसपा)को महत्त्व अझै बढेर गएको जसपा नेपालका अध्यक्ष उपेन्द्र यादवले दावी गरेका छन् ।
शनिबार मधेश प्रदेशको राजधानी जनकपुरमा प्रेस मञ्च नेपालले आयोजना गरेको पत्रकार सम्मेलनमा बोल्दै अध्यक्ष यादवले जसपा नेपालको महत्त्व थप बढेको दावी गरेका हुन् ।
‘हाम्रो पार्टी अझ नयाँ ढङ्गले सुदृढ भएर अगाडि बढ्छौँ’, पत्रकार सम्मेलनमा सञ्चारकर्मीहरुको जिज्ञासाको जवाफ दिँनै यादवले भने ।
पार्टीको आसन्न प्रथम एकताको महाधिवेशनको तयारी बारे जानकारी दिन आयोजित पत्रकार सम्मेलनमा उनले जसपा नेपाल र जसपा नेपालबाट चोइटिएकाको समेत सहभागिता बिना कुनै पनि सत्ता र शक्तिको निर्माण नभएको जिकिर गरे ।
लोकतान्त्रिक र समाजवादी शक्तिहरुसँग मिलेर अगाडि बढेको जानकारी दिँदै यादवले भने –‘डायमण्डलाई जति सानो टुक्रा पारे पनि त्यो डायमण्ड नै हुन्छ । चुम्बकलाई सानो टुक्रा पारे पनि त्यसको कण मात्रै पनि चुम्बक नै हुन्छ ।’
जसपा नेपालको प्रथम राष्ट्रिय महाधिवेशन यही जेठ २८, २९ र ३० गते जनकपुरधाममा आयोजना हुँदैछ । २८ गते जनकपुरधामस्थित तिरहुतिया गाछीमा महाधिवेशनको उद्घाटन सत्र सम्पन्न हुनेछ भने सो समारोहमा भारत, मलेशिया, स्पेन, अजरबैजान, इन्डोनेशियालगायतका देशहरुको लोकतान्त्रिक पार्टीका प्रतिनिधिहरुको सहभागीता रहने छ ।
दोस्रो दिन जेठ २९ गते जसपा नेपालको राजनीतिक वैचारिक दस्तावेज बारे आवश्यक छलफलसहित पारित गरिने र तेस्रो तथा अन्तिम दिन जेठ ३० गते निर्वाचन सत्रको आयोजना गरिने अध्यक्ष यादवले जानकारी दिए ।
जसपा विभिन्न राजनीतिक दल, घटक सङ्गठन, मोर्चा, आन्दोलन र अभियान मिलेर बनेको भन्दै अध्यक्ष यादवले एकता महाधिवेशनले सबैको भावना समेट्ने दावीसमेत गरेका हुन् ।
अध्यक्ष यादवले हालै सरकारले ल्याएको बजेटलाई आग्रहपूर्ण भनेर टिप्पणी गरे । ‘यो प्राथमिकता हराएको बजेट हो । यस बजेटले बेरोजगारी घटाउँदैन । शिक्षा र स्वास्थ्यको अवस्था समेत सुध्रिदैन । शिक्षा, स्वास्थ्य र कृषिलाई प्राथमिकतामा राखेर अगाडि बढ्न सरकार चुकेको छ ।’
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
