वराहक्षेत्र । कविता लेखन र पत्रकारितामा सक्रिय रहेका प्रकाश दिप्साली राईको गीत “त्यो तिम्रो मनमा….” नयाँवर्षसँगै एक कार्यक्रमबीच सार्वजनिक गरिएको छ ।
स्वर्णिम साहित्य समाज, बराहक्षेत्र –३ ले एक कार्यक्रमको आयोजना गर्दै सो गीतको सार्वजनिक गरेको हो । कार्यक्रमका प्रमुखअतिथि बराहक्षेत्र –३ का वडाअध्यक्ष राजदीप लामाले सो गीतलाई बजाएर सार्वजनिक गरेका हुन् भने सोही समयमा रामबाबु राई अफिसियल युटयुब च्यानलबाट पनि सो गीतको सार्वजनिक गरिएको थियो ।
बराहक्षेत्र नगरपालिकामा रहेर निरन्त कलमको साधना गरिरहेका प्रकाश दिप्साली राईको सो गीतमा सुगम सङ्गीतका धरोहर प्रख्यात गायक स्वरूपराज आचार्यले सुमधुर स्वर भरेका छन् । सो गीतमा गायक तथा सङ्गीतकार रामबाबु राईले सङ्गीत भरेका छन् । यस्तै मिक्सिङ एरेन्ज राजु कार्कीले गरेका छन् । स्टुडियो किङमा रेकर्ड गरिएको सो गीतमा सुरेश राईले रेकर्डिङको भुमिका निर्वाह गरेका छन् । जेस्केलो क्रिएसनले स्टुडियो भिडियो तयार पारेको छ ।
“सपनाहरू देख्दै जानुपर्ने रहेछ मरिएनछ भने पूरा हुँदै जानेरहेछ । आज मैले कुनै दिन देखेको सपना पूरा भएको छ । आफू काममा विश्वास गर्ने भएकाले मलाई सफलता असफलताले आजसम्म फरक पारेको छैन ।” गीत सार्वजनिकपश्चात दिप्सालीले बताए । “म सिर्जनामा विश्वास राख्ने मान्छे हुँ, यो समाज र सिर्जनाले दिएको जिम्मेवारी पूरा गर्न म र मेरो संस्था सदा कटिवद्ध छु । स्वर्णिम साहित्य समाजको अक्षयकोष अभियानमा जोडिएर साथ दिन सबैलाई अनुरोध गर्दछु । हामी बराहक्षेत्रको नामलाई उचाइमा पुराउन चाहन्छौं ।” दिप्सालीको थप भनाई थियो ।सो गीतलाई गायक निरज राईले सुमधुर स्वरमा प्रस्तुत पनि गरेका थिए । उनले दिप्सालीको गीत लेखनले आफू प्रभावित भएको समेत बताए ।
सोही अवसरमा स्थानीय रचना वाचनको कार्यक्रम राखिएको थियो । सो कार्यक्रममा दर्जन बढी सर्जकले आफ्नो सिर्जना प्रस्तुत गरे । प्रकृती राई, शारदा निरौला “शारु”, सुर्य तामाङ, रविन्द्र केदेम, सविता फागो, बिमला श्रेष्ठ, वर्षा भण्डारी, दीपा मग्राती, सूर्य बस्नेत, छविलाल चौधरी, लक्ष्मण कटुवाललगायतले आफ्नो रचना प्रस्तुत गरे । यस्तै कार्यक्रमका विशेष अतिथि बेलायतबाट आएका पर्यावरणीय कवि बिजय हितानले मनसुन जस्ता शक्तिशाली कविता सुनाए भने कार्यक्रमका विशेष कवि दिलिप बान्तावाले “नयाँ बर्ष” र “रगत माग्ने देशको नाममा” जस्ता शक्तिशाली कविता प्रस्तुत गरे ।
सो कार्यक्रममा आफ्नो सदस्य मनोज विष्ट चक्रघट्टी जेसिसको कला साहित्य विभाग प्रमुखमा नियुक्त भएकोमा गौरवान्वित महसुस गर्दै बधाई ज्ञापन समेत गरिएको थियो । सभाध्यक्ष र प्रमुख अतिथिले अबिर टिकाले विष्टलाई सम्मान गरेका थिए । स्थानीय रचनाहरू माथी बोल्दै वक्ता प्राध्यापक इन्दिरा महर्षीले स्वर्णिम साहित्य समाजले आजैबाट स्वर्णिम भविष्यको सङ्केत गरेको बताइन् । “आजका यी साना नानीहरूलाई यो समाजले स्थान दिनु भनेको भोलिको यो समाज हाक्ने जनशक्ति जन्माउनु हो । आजको रचनाहरूप्रति मेरो सम्मान छ ।” महर्षीले भनिन् ।
कार्यक्रमका प्रमुखअतिथि वराहक्षेत्र –३ का वडाअध्यक्ष राजदीप लामाले स्वर्णिम साहित्य समाज बराहक्षेत्र –३ को त हो नै अझ यो नगरपालिकाको अमुल्य सम्पत्ति रहेको बताए । यो सम्पत्तिलाई अझ धनी बनाउन यो वडा सदा लागिपर्ने बताए । कार्यक्रममा कल्याण विष्ट, पुर्व वडाध्यक्ष रुद्र दाहाल र बिजय हितानले शुभकामना मन्तव्य राखेका थिए । बराहक्षेत्र वडा नं ३ सभाहलमा समाजका सचिव लक्ष्मण कटुवालले सञ्चाल गरेको सो कार्यक्रममा स्वागत मन्तव्य समाजका सहसचिव सविता फागोले राखेकी थिइन् भने सभाध्यक्ष समाजका उपाध्यक्ष शरण लिम्बु रहेका थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
