जनकपुरधाम, १९ चैत । संघीयता र समाजवादको आधारभूत स्तम्भ नागरिकको वाक स्वतन्त्रता र स्वतन्त्र प्रेस भएको निष्कर्ष प्रेस मञ्च नेपालले निकालेको छ ।
जनता समाजवादी पार्टी नेपाल (जसपा) निकट पत्रकारहरूको संगठन प्रेस मञ्च नेपालले आयोजना गरेको एक अन्तरकृयाका वक्ताहरूले यस्तो धारणा राखेका हुन् । शुक्रबार प्रेस मञ्च नेपालले मधेश प्रदेशको राजधानी जनकपुरधाममा आयोजनागरेको ‘संघीयता, समाजवाद र पत्रकारिता विषयक अन्तरकृया कार्यक्रम’का वक्ताले सञ्चार माध्यम र सञ्चारकर्मी सचेत भएमा मात्रै देश र मधेशले प्राप्तगरेका उपलव्धिहरूको रक्षा गर्न सकिने बताएका थिए ।
संघीयतामाथि प्रहार भैरहेको र यसलाई समाप्त पार्ने खेल देशैभर विभिन्न बहानामा चलिरहेको भए पनि त्यो असम्भव हुने कार्यक्रमका वक्ताहरूको भनाई थियो ।
मधेश प्रदेश सरकारका सामाजिक विकास मन्त्री सुरिता साह, प्रदेश सभाका सदस्य एवम जसपा संसदीय दलका मुख्य सचेतक रामाशिष यादव, मधेश प्रदेश मुख्यमन्त्रीका प्रेस सल्लाहकार एवम वरिष्ठ पत्रकार सीताराम अग्रहरीलगायत वक्ताले संघीय समाजवादको कार्यभार पूरा गर्न राज्य, दलहरू र नागरिकस्तरबाट सहयोग र आपसी समन्वय हुनुपर्ने जिकिर गरे ।
जसपा संघीय परिषद सदस्य प्रेमचन्द्र झाले नेपालमा मधेश विद्रोहका माध्यमबाट संघीयता स्थापित गर्ने जसपा र यसको नेतृत्व गर्ने जसपा अध्यक्ष उपेन्द्रयादवमाथि ढोंगी र नक्कली संघीयतावादीहरूले अनर्गल प्रचार गरेको भन्दै प्रेस मञ्च नेपाल र सम्पूर्ण पहिचान र संघीयता पक्षधरहरूले यस्ता ढोंगीहरूको प्रतिवाद गर्नुपर्ने बताएका थिए ।
आम सञ्चार प्राधिकरणका अध्यक्ष श्यामसुन्दर यादव र मिडिया काउन्सिल मधेश प्रदेशका कार्यवाहक अध्यक्ष कैलाश दासले मधेशमा सञ्चार माध्यम र पत्रकारहरूको वृत्ति विकाससँग सम्बन्धित कार्यका लागि प्रभावकारी ऐन निर्माण र कार्यान्वयन हुनुपर्नेमा जोड दिए ।
उनीहरूले सरकारले सञ्चार क्षेत्रलाई उच्च प्राथमिकता दिएर पर्याप्त बजेट उपलव्ध गराउनेमा आफूहरू आशावादी रहेको धारणा राखेका थिए ।
कार्यक्रममा प्रेस मञ्च नेपालका पूर्व उपाध्यक्ष आतिश मिश्राले प्रेस मञ्च नेपाल र जसपा नेतृत्वको सरकारबीच मजबुद सहकार्य भएमा मधेश प्रदेश र यसको प्रभावकरिताबारे जनतालाई बुझाउन सहज हुने धारणा राखेका थिए ।
प्रेस मञ्च नेपालका अध्यक्ष कमन देवानको अध्यक्षतमा सम्पन्न कार्यक्रममा महासचिव अवधेश झाको सञ्चालन, उपमहासचिव देवेन्द्र खापुङले स्वागत गरेका थिए भने उपाध्यक्ष मनोज यादवले सहभागीहरूलाई धन्यवाद ज्ञापन गरेका थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
