इलाम – फाक्फोक थुम गाउँपालिकास्थित फुङएतेप्पामा प:त्लुङ लेप्मा (छेलोढुङ्गा हान्ने) प्रतियोगिता सम्पन्न भएको छ । सोमबार फुङ्वा युवा समुह फुङएतेप्पाद्वारा आयोजित चासोक तङ्नामको अवसरमा सम्बोधन गर्दै किरात याक्थुङ चुम्लुङ्का राष्ट्रिय सदस्य तथा लिम्बु साँस्कृतिक परिषदका केन्द्रीय उपाध्यक्ष सागर केरुङ्ले अब लिम्बू समुदायले मुक्तिको प:त्लुङ (छेलोढुङ्गा) हान्नुपर्ने बताएका छन । उक्त प्रतियोगितामा घनश्याम चौलागाईं प्रथम र तारा लिम्बु दोस्रो भएका छन । गत मंसिर ४ को निर्वाचनलाइ लक्षित गर्दै लिम्बु समुदायले सहि ठाउँमा छेलो नहानेको व्यंग्य गरेका छन । उनले भने ‘मुन्धुममा पोरोक्मिले हानेको छेलोढुङ्गा कोङकोङलुङमा पहाडमाथि थुरिंदा धर्ती र आकाशले भरिएको पानीको घैँटो फुट्यो र ठूलो आँधि बतास चल्यो, चट्याङ पर्यो, बज्र खस्यो । प:त्लुङ लिम्बू जातिको बल, शक्ति, शौर्य, ओज, सिद्वि र सामर्थ्यको प्रतीकको रुपमा लिइन्छ । त्यसैले यसपटक मंसिर ४ मा लिम्बु समुदायले गलत ठाउँमा छेलोढुङ्गा हानियो’ । एउटा साँस्कृतिक जागरणकै रुपमा प्रत्येक बर्ष चासोक तङ्नाम आयोजना गरिदै आएको कार्यक्रम सञ्चाक दिपक योङ्हाङ्ले बताए । पक्लुङलाई खस नेपालीमा छेलोढुङ्गा र अंग्रेजीमा सटपुट भन्ने गरिन्छ । यसमा एउटा गह्रौँ ढुङगालाई निश्चित रेखाबाट कुदेर वा यथास्थानबाट फाल्ने गरिन्छ । यस खेलको पनि आफ्नै किसिमको अनुशासन र नियमहरू हुन्छन् ।
यसलाई लिम्बू जातिले अत्यन्तै महत्वपूर्ण साँस्कृतिक खेलको रुपमा लिने गर्छन् । विभिन्न चाडपर्व, हाटमेलामा र तङसिङ तक्मा गर्दा अनिवार्य रुपमा यो खेल खेल्ने गरिन्छ । यस खेलको स्रोत मुन्धुम हो । मुन्धुममा पोरोक्मी याम्भामी माङले पक्लुङ हानेको मार्मिक आख्यान पाइन्छ । अहिले लिम्बू समुदायमा पक्लुङ हान्ने प्रचलन विस्तारै हराउँदै गएको छ । बेलाबेला मात्र याक्थुङजन्य संघ संस्थाहरुले पक्लुङ हान्ने कार्यक्रमको आयोजना गरेको देखिन्छ । मुन्धुममा पक्लुङलाई बल, शक्ति, शौर्य, ओज, सिद्वि र सामर्थ्यको प्रतीकको रुपमा लिइन्छ । तर, यसबारे अचेल कहिँ कतै पनि चर्चापरिचर्चा नहुनु दुःखद पक्ष बनेको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
