चुनाव–२०७९ को लागि विभिन्न प्रतिभाका उम्मेद्वारहरू चुनावी अभियानमा होमिएका छन् । कोही जीवनभर पार्टीलाई योगदान दिएका उम्मेद्वार छन् भने कोही राजनीतिलाई बुझेर त कोही पार्टीको लागि उभिनुपर्ने अवस्था बोकेर उम्मेद्वारी दिएका छन् । त्यस्तै भोजपुर जिल्लाको प्रदेश ‘ख’ बाट युवा नेता आशकुमार राई निर्वाचनमा होमिएका छन् । आशकुमार जनता समाजवादी पार्टी, नेपालका तर्फबाट निर्वाचनमा होमिएका हुन् ।
जमान सिंह राई र राङ्ग्रीसामा राईको कोखबाट हतुवागढी ६ भोजपुरमा जन्मिएका आशकुमारले एमएड र एलएलबी गरेका छन् । उनलाई जिल्लामा शिक्षित तथा जिल्लावस्तुस्थिति बुझेको नेताको रुपमा हेरिने गरिन्छ ।
आशकुमार राईको निर्वाचन क्षेत्रमा आमचोक, हतुवागढी, रामप्रसाद राई गाउँपालिका पर्छन् भने पौवादुङ्माको तीन, चार, पाँच र छ वडाहरु छन् । त्यसैगरी भोजपुर नगरपालिकाका छ, सात, आठ, नौं, एघार र बाह्र वडा र ट्याम्के मैयुङका छ, सात, आठ र नौ वडाहरू पर्छन् । प्रदेश सभाको निर्वाचन क्षेत्र ‘ख’मा यसअघि प्रदेश १ का मुख्यमन्त्री शेरधन राई विजेता बनेका थिए । यसपटक आशकुमारले जित्ने दाबी गरेका छन् । उनका मुख्य प्रतिद्धन्द्धी नेपाली काँग्रेसबाट विनोदकुमार वान्तवा र नेकपा एमालेबाट खड्गबहादुर कार्की छन् ।
राजनितिक यात्रा
२०४३ अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)बाट राजनीतिक यात्रा शुरु गरेका हुन् आशकुमारले । उनले प्रारम्भिक कमिटीमा सदस्यबाट शुरु गरेका हुन् । आन्दोलनताका बनेको वाममोर्चाको २०४६ मा वडाअध्यक्ष बनेका थिए । २०४७ एमाले गाउँ सदस्य, २०५२ मा युवा संघ इलाका अध्यक्ष, २०५४–५६ माले निकट युवा संघको जिल्ला सचिव, २०५६–५८ अध्यक्ष, २०६५–७९ सम्म एमालेको जिल्ला सदस्य रहेका काम गरेका थिए ।
२०६९ सालमा बनेको संघीय समाजवादी पार्टी, नेपाल बनेपछि त्यस पार्टीबाट राजनीति गर्न थालेका उनले २०७२ साल सम्म जिल्ला अध्यक्ष बनेका थिए ।
विभिन्न पार्टीहरुसँग एकता गर्दै बनेको जनता समाजवादी पार्टी, नेपालको अध्यक्ष तथा प्रदेश सदस्य छन् । उनले वि.सं. २०७० सालको संविधानसभा सदस्यमा भोजपुरबाट उम्मेद्वार पनि बनेका थिए ।
शिक्षण अनुभव
आशकुमार राईले लामो समय शिक्षण पेशामा आवद्ध भएका थिए । उनले बालकन्या प्राविमा ३ वर्ष पढाएका थिए भने सगरमाथा उच्च मावि, रानिबास घोरेटारमा ९ वर्ष पढाएका हुन् ।
लामो समय शिक्षण पेशामै आवद्ध भएका कारण उनले आफ्नो योजनामा शैक्षिक प्रणालीको रुपान्तरणलाई मुख्य विषय बनाएका छन् ।
अन्य चुनावी एजेण्डाहरू
आशकुमार राईले संघीय शासन व्यवस्थाको प्रतिरक्षा, सांस्कृतिक पहिचान सुनिश्चितता तथा भोजपुरको दीगो समृद्ध आर्थिक विकासलाई प्राथमिकतामा राखेका छन् । त्यसैगरी समानुपातिक समावेशीकरण, सुशासन र सदाचार, पर्यावरणीय सन्तुलन आदिलाई चुनावी एजेण्डाको रुपमा अगाडि सारेका छन् ।
यिनै चुनावी एजेण्डा तथा जनताको मनोभावना बुझेकैले आशकुमारको उम्मेद्वारी अन्य उम्मेद्वारको लागि भारी पर्ने आशकुमारको दाबी छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
