-पदम सुखी सम्बाहाम्फे
पाँचथर, ११ जेठ । कुम्मायक गाउँपालिकाको केन्द्रमा रहेको अमृत आधारभूत विद्यालय यासोकका ५० जना जेहेन्दार विद्यार्थीलाई सुसाङमा फेवदेन स्मृति अक्षयकोषले पुरस्कृत गरेको छ ।
अमृत आधारभूत विद्यालयको प्राङ्गणमा आज भएको छैटौं बार्षिकी अक्षयकोष समारोहमा विद्यार्थीहरुलाई २६ हजार ५ सय मुल्य बराबरको स्कुल ब्याग बितरण गरिएको थियो । अक्षयकोषको मूलधन हाम्रो बचत तथा ऋण सहकारी सस्थाको मुद्दती खातामा रहेकोे रकमले विद्यालयका निम्न आय भएका अनुशासित जेहेन्दार विद्यार्थीहरुलाई पुरस्कार दिइएको अक्षयकोषका अध्यक्ष पदम फेवदेनले बताएका छन् ।
स्वः सुसाङमा फेवदेनका बुबा अम्बर बहादुर फेवदेन र आमा देविन्द्रकुमारी शेर्मा फेवदेनका छोरी हुन् । २०५८ माघ २० गते जन्मिएका सुसाङमाको २०६८ कार्तिक १२ गते उपचारका क्रममा युकेमा निधन भएको थियो । १० बर्षको कलिलो उमेरमा निधन भएकी सुसाङमा अमृत आधारभूत विद्यालयमा पनि अध्यन गरेको र यस विद्यालयका विद्यार्थीहरुको पढाइमा थप क्षमता विकास होस् भन्ने उद्देश्य रहेकोे कोषका अध्यक्ष फेवदेनले बताए ।
बाटोघाटोमा चौतारी बनाएर पैसा खर्च गर्नुभन्दा निम्न आय भएका अनुशासित र जेहेन्दार विद्यार्थीको पढाईमा हौसला मिल्ने सामाजिक कार्य गर्नु नै उचित हुने पृथ्वी माध्यमिक विद्यालयका प्रधान अध्यापक ऋृषिराम गजुरेलले बताएका थिए । उक्त कार्यक्रममा गाउँपालिकाका अध्यक्ष बमप्रसाद लावती, उपाध्यक्ष महेन्द्र बहादुर खड्का, यासोक क्यापस प्रमुख कर्ण लावती लगायत शिक्षक विद्यार्थी तथा अभिभावक र नागरिक समाजको पनि उपस्थिति रहेको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
