लेटाङ, मोरङ २० चैत्र । ६५ औं राष्ट्रिय सहकारी दिवस –२०७८ प्रदेश नं. १, प्रदेश प्रमुख माननीय परशुराम खापुङद्वारा उद्घाटन भएको छ । जिल्ला सहकारी संघ लिमिटेड मोरङद्वारा आयोजित कार्यक्रम मोरङको उत्तरी क्षेत्रमा लेटाङमा सम्पन्न भएको थियो ।
उद्घाटनमा माननीय प्रदेश प्रमुख परशुराम खापुङले सहकारीले नेपालको आर्थिक मेरुदण्ड बन्न सकेको बताए । त्यसैगरी नेपालको आधिकांश जग्गा बाँझो रहेकोले सहकारीले त्यस्ता ठाउँमा कृषि तथा उत्पादनमा लगानी गर्नुपर्ने प्रदेश प्रमुखले औंल्याएका थिए । करिब ७३ लाख व्यक्ति सहकारीसँग आवद्ध रहेकोमा ५६ प्रतिशत महिलाहरूको उपस्थिति रहेकोमा महिलाहरूको शसक्तिकरणमा बल पुगेको पनि प्रदेश प्रमुख खापुङले बताए ।
विभिन्न झाँकीहरूसहित नगरपालिका परिक्रमा गरेर शुरु गरेको कार्यक्रममा लेटाङ नगरपालिकाका मेयर शंकर राई, राष्ट्रिय सहकारी महासंघ नेपालका उपाध्यक्ष रमेशप्रसाद पोखरेल, प्रदेश नं. १ यातायात व्यवस्था तथा सञ्चार मन्त्री उपेन्द्र घिमिरे, भूमि व्यवस्था, सहकारी तथा गरिबी निवारण मन्त्री ओमप्रकाश सराबगी, लेटाङ क्षेत्रबाट संघीय सांसदमा प्रतिनिधित्व गर्नुहुने घनश्याम खतिवडालगायतले कार्यक्रममा मन्तव्य दिएका थिए ।
वि.सं. २०१० सालमा योजना विकासको लागि कृषि मन्त्रालयको मातहतमा सहकारी विभागको स्थापना भएर नेपालमा सहकारी अभियान शुरु भएको हो भने वि.सं. २०१३ साल चैत्र २० गते चितवनमा बखान ऋण सहकारी संस्था स्थापना भएको थियो । त्यसैले हरेक चैत्र २० गते सहकारी दिवस मनाइने गरिन्छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
