न्युयोर्क । अमेरिकामा चासोक तङ्नाम धुमधामका साथ मनाइएको छ । किरात याक्थुङ चुम्लुङ् अमेरिकाको आयोजनामा अमेरिका निवासी लिम्बुहरुले न्युयोर्कमा चासोक मनाएका हुन् ।

किरात याक्थुङ् चुम्लुङ् अमेरिका अध्यक्ष सुमन थाम्सुहाङ्को अध्यक्षतामा सम्पन्न उक्त कार्यक्रममा बोल्दै किराया पुर्वअध्यक्ष दिपेश खाम्बेकले सबै याक्थुङ र गैर याक्थुङ्हरूमा बिशेष शुभकामना व्यक्त गरे । साथसाथै आदिवासी÷जनजाति लेखक सङ्घका वरिष्ठ उपाध्यक्ष टङ्क सेलिङले अमेरिकामा आफ्नो पहिचान जोगाउन चुनौती रहेको तर्क प्रस्तुत गर्दै, ग्वोबल भिलेजको जमानामा याक्थुङ्हरूको संस्कार, संस्कृति र भाषालाई विश्वव्यापीकरण गर्न सबै याक्थुङ् र अमेरिकी नेपालीहरू लाग्नुपर्ने बताए ।

त्यस्तै, शुभकामना आदानप्रदान गर्ने क्रममा लोक चेम्जोङ्ले आदिवासी अन्तर्गत याक्थुङ् जातीले नेपालमा हुने राजनीतिक परिवर्तन र आन्दोलनमा सहभागी हुने र सहयोग गर्नुपर्ने कुरा राख्दै, सबैमा चासोक तङ्नामको शुभकामना व्यक्त गरेका थिए । कार्यक्रममा युनाइटेड किरात राई अर्गनाइजेसन अमेरिकाका अध्यक्ष केशवराम राईले पनि शुभकामना मन्तव्य राखेका थिए ।

त्यस्तै, कार्यक्रममा कवि बिबश बेनामले लिम्बु भाषामा स्वागत मन्तव्य र गजल प्रस्तुत गर्दा कार्यक्रममा रौनक छाएको थियो ।

फिप्ना अमेरिकाका अध्यक्ष लोक चेम्जोङको प्रमुख आतिथ्यता रहेको उक्त कार्यक्रममा चुम्लुङ् पूर्वमहासचिव लिला सिङ्गक, आदिवासी÷जनजाति लेखक महासङ्घ बरिस्ठ उपाध्यक्ष टङ्क सेलिङ्, पूर्व चुम्लुङ् अध्यक्ष विरेन्द्रहाङ् लावुङ्, पूर्व चुम्लुङ अध्यक्ष दिपेश खाम्बेक र युनाइटेड किरात राई अर्गनाइजेसन अमेरिका अध्यक्ष केशवराम राई लगायत विशेष अतिथि रहेका थिए ।

अन्त्यमा, अमेरिकामा रहने नेपाली, आदिवासी/जनजाति र याक्थुङ् जातिको लागि चुम्लुङ्ले सृजनशिल कार्यक्रम ल्याउने प्रतिबद्वता व्यक्त गर्दै, चुम्लुङ्,अमेरिका अध्यक्ष सुमन थाम्सुहाङ्ले कार्यक्रम समापन गरेका थिए भने, कार्यक्रम अमेरिका चुम्लुङ्का महासचिव सुर्य लिङ्देनले संचालन गरेका थिए ।