पदम सुखी सम्बाहाम्फे
पाँचथर, २५ कात्तिक । कुम्मायक गाउपालिकास्थित यासोक बजारमा सञ्चालित सहारा नेपाल बचत तथा ऋण सहकारी सस्थाले राष्ट्रिय विभुति महागुरु फाल्गुनन्द लिङ्देनको जन्म जयन्तीको अबसरमा गाउपालिकाले दिएको सार्वजनिक विदाको अवज्ञा गरेको छ ।
सहारा नेपाल बचत तथा ऋृण सहकारी सस्था शाखा यासोकका फिल्ड मेनेजर रेवती प्रसाद घिमिरेले सहकारी संस्थाको आफ्नै किसिमका नीति नियम भएकोले स्थानीय सरकारद्वारा गरिएका बिदाहरू मान्य नहुने बताए ।
कुम्मायक गाउपालिका वडा नम्बर ४ स्थित माथिल्लो टोलमा रहेको सप्तरङ्गी सहारा महिला समुहको आज भएको बैठक सञ्चालन गर्ने क्रममा घिमिरेले सो कुरा बताएका हुन् । २०७४ सालमा स्थापना भएको यो संस्था हाल कुम्मायक, तुम्बेवा, फाल्गुनन्द र मिक्लाजुङ गाउपालिकाहरूमा गरि जम्मा १४ सय महिला सदस्यहरूसँग कारोबार रहेको पनि घिमिरेले बताए ।
ऋण लिएको महिना दिनमै साँवाब्याज तिर्न असमर्थ
बाख्रा, बङ्गुर, गाईभैंसी, कुखुरा पालनजस्ता विभिन्न शिर्षकमा ऋण प्रवाह गरेको महिनादिन पुगेपछि ऋणीहरूलाई किस्तामा साँवाब्याज असुलिन्छ तर महिना दिनमै किसानसँग ऋणको किस्ता तिर्न आम्दानी नभएको ऋणी महिलाहरूको गुनासो छ । सोझासाझा किसान तथा महिला बर्गलाई आम्दानी बेगरको ऋण थोपारेर आर्थिक शोषण भइरहेको त छैन भन्ने सवालमा स्थानीय सरकारको पनि ध्यानाकर्षण होस् भन्छिन्, सप्तरङ्गी महिला समुहका सदस्य नरमाया सम्बाहाम्फे ।
सार्वजनिक बिदामा समेत आफुले चलाएको ऋणको किस्ता तिराएर बित्तीय सस्थाहरू दिनका दिन मोटाइरहेका छन् तर ऋणीमहिलाहरूलाई प्रत्यक्ष लाभ पुग्ने र जीवन स्तर उकास्ने के कस्तो योगदान रहन्छ भन्ने कुरामा प्रश्न उठिरहेको अन्य महिला समुहको पनि चासो हुन थालेको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
