‘भद्रपुर सहर हाम्रो घर’ नारालाई मूल अवधारणा बनाएर राष्ट्रिय प्रजातन्त्र पार्टी भद्रपुर नगर समितिले नगर निर्वाचनका लागि प्रतिबद्धतापत्र सार्वजनिक गरेको छ ।
नगर निर्वाचन परिचालन समितिको आयोजनामा निर्वाचन संयोजक अभिषेक ढुङ्गाना, नगर प्रमुखका उम्मेदवार नवराज पनेरु, उपप्रमुखका उम्मेदवार राधा कार्की र नगर अध्यक्ष बाबुराम पराजुलीले नगरको विकास, कृषि, शिक्षा, पर्यटन, सामाजिक तथा आर्थिक क्षेत्र समेटेर तयार पारिएको प्रतिबद्धतापत्रलाई सार्वजनिक गर्नुभएको हो ।
भष्ट्राचारविरुद्ध नेतृत्व तह खुलेर उत्रने प्रतिज्ञासहित आफूहरु चुनावी मैदानमा उत्रिएको प्रमुखका उम्मेदवार पनेरुले जानकारी दिनुभयो ।
निर्वाचित भए एक महिनाभित्र प्रत्येक परिवारको आर्थिक हैसियतको अध्ययन गर्न लगाएर आर्थिकस्तर उकास्ने कार्यक्रम तत्काल सञ्चालन गर्ने प्रतिबद्धता जनाउनुभयो ।
झापा उद्योग वाणिज्य सङ्घका अध्यक्षसमेत रहनुभएका पनेरुका अनुसार नगरमा विशेष आर्थिक क्षेत्र स्थापना, लगानीमैत्री वातावरणको सिर्जना र ‘एक घर एक रोजगार’को व्यवस्थालाई प्रतिवद्धतापत्रमा समेटिएको छ । रासस