सर्लाही, २८ जेष्ठ ।
सर्लाहीका प्रभावशाली नेता एवम् कार्यकर्ताहरुको ठूलो समूह आज संघीय समाजवादी फोरम, नेपालमा प्रवेश गर्दैछन् ।
मधेशको विकास र समृद्धिसँग प्रत्यक्ष सरोकार राख्ने स्थानीय तहको निर्वाचन हुनु पर्ने पक्षमा रहेका हजारौं कार्यकर्ताहरुलाई फोरम नेपालका अध्यक्ष उपेन्द्र यादवले स्वागत गरेर पार्टी प्रवेश गराउने कार्यक्रम रहेको छ ।
संघीय समाजवादी फोरम नेपाल सर्लाहीले जिल्लाको क्षेत्र नम्बर ५ मधुवनमा आइतबार दिउँसो आयोजना गर्ने पार्टी प्रवेश एवम् विशाल सभामा नेपाली काँग्रेस, नेकपा एमाले, नेकपा माओवादी केन्द्र र राजपा परित्याग गरि हजारौंको संख्यामा पार्टी प्रवेश गर्ने कार्यक्रम रहेको ससफो नेपालका सर्लाही अध्यक्ष अशोक यादवले जानकारी दिनुभएको छ ।
राजपाका अध्यक्ष मण्डलका नेता महन्थ ठाकुर, राजेन्द्र महतो र महेन्द्र राय यादवको सर्लाही गृह जिल्लामा यसरी हजारौंको संख्यामा नेता कार्यकर्ताहरु ससफो नेपालमा प्रवेश गर्न लागेका हुन् । ससफो नेपालले पार्टी प्रवेशको लागि आयोजना गरेको क्षेत्र नम्बर ५ को मधुवन राजपाका महामन्त्री एवम् सांसद् जंगीलाल राय यादवको निर्वाचन क्षेत्र हो ।
कार्यक्रमका प्रमुख अतिथि रहेका ससफो नेपालका अध्यक्ष उपेन्द्र यादव नवप्रवेशी नेता कार्यकर्ताहरुलाई पार्टी प्रवेश एवम् चुनावी सभाको लागि आइतबार बिहान सर्लाही प्रस्थान गर्नुभएको ससफो नेपाल सर्लाहीले जानकारी दिएको छ ।
स्थानीय तहको चुनावलाई संघर्षको मुख्य कार्यदिशा बनाएर चुनावमा होमिएको फोरम नेपालमा पार्टी प्रवेश गर्नेको लहर पछिल्लो समय व्यापक हुँदै गइरहेको छ । मधेससँगै पूर्वी पहाडमा पनि ससफो नेपाल प्रवेश गर्नेको लहर बढेको पार्टी स्रोतले जनाएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
