दमक, २७ जेठ ।
संघीय समाजवादी फोरम नेपालले शनिबारबाट कमल गाउँपालिकामा चुनावी अभियानलाई तीव्रता दिएको छ ।
शनिबार कमल गाउँपालिकाका सबै वडालाई समेटेर बृहत् घरदैलो कार्यक्रम सम्पन्न गरिएको ससफो नेपालका लिम्बुवान प्रदेश समिति सदस्य दिपेन बाला राईले जानकारी दिनुभयो । कमल गाउँपालिकाका सबै वडाहरुमा वडास्तरीय प्रचारात्मक कार्य जारी रहेको भन्दै राईले गाउँपालिकाका सबै वडाहरुमा चुनावी सन्देश प्रवाह गर्ने उद्देश्यले बृहत् चुनावी प्रचार कार्य सम्पन्न गरिएको बताउनुभयो ।
ससफो नेपालले कमल गाउँपालिका अध्यक्ष पदमा जितु राईलाई उम्मेद्वार चयन गरेको छ । त्यस्तै उपाध्यक्षमा पुस्ता लिङ्देन, कमल गाउँपालिका वडा नम्बर ४ को वडा अध्यक्षमा विवेक राई, कमल गाउँपालिका वडा नम्बर ५ को वडा अध्यक्षमा दिवाकर राई, कमल गाउँपालिका वडा नम्बर ६ को वडा अध्यक्षमा अर्जुनदेव राई र वडा नम्बर ७ को वडा अध्यक्षमा जगत सम्बाहाम्फेलाई उम्मेद्वार चयन गरेको पार्टी स्रोतले जनाएको छ ।
त्यस्तै झापाको दमकमा जारी ससफो नेपाल र नयाँ शक्ति पार्टी नेपालको चुनावी घरदैलो कार्यक्रम शनिबार दमक बजार (दमक–६) मा सुरु भएको ससफो नेपाल लिम्बुवान प्रदेश समिति सचिवालय सदस्य पदमकुमारी राई (लिम्बू)ले जानकारी दिनुभएको छ । दमक–६ पछि जेठ २८ र २९ गते दमक–७ मा घरदैलो केन्द्रित हुने बताइएको छ ।
उता झापाको भद्रपुर नगरपालिकामा पनि चुनावी घरदैलो कार्यक्रम तीव्र गतिमा जारी रहेको ससफो नेपाल लिम्बुवान प्रदेश समिति सदस्य समर राईले जानकारी दिनुभएको छ । भद्रपुरमा सत्रुधन चौधरी मेयर पदमा र शर्मिला फेवादिन (आङ्देम्बे) उपमेयरसहित विभिन्न वडामा उम्मेद्वारी घोषणा गरिएको राईको भनाइ छ ।
झापाको मेचीनगर नगरपालिका, बुद्धशान्ति गाउँपालिका, झापा गाउँपालिका र बाह्रदशी गाउँपालिकामा पनि चुनावी घरदैलो कार्यक्रम जारी रहेको ससफो नेपाल झापाका सचिव सुशील राईले बताउनुभएको छ ।

ससफो नेपालमा प्रवेश गर्ने बढे

यसैबीच शुक्रबार र शनिबार गरी झापामा ४४ जनाले संघीय समाजवादी फोरम, नेपालमा प्रवेश गरेका छन् ।
शुक्रबार दमक ९ का विभिन्न १७ जना युवा काँग्रेस, एमाले लगायत पार्टी परित्याग गरि ससफो प्रवेश गरेका पार्टीका दमक नगर सचिव हरि राईले जानकारी दिनुभयो । उनीहरु ससफोको सिद्धान्तमा प्रतिबद्ध भएर पार्टी प्रवेश गरेका बताइएको छ । सो कार्यक्रममा पार्टीका केन्द्रीय सदस्य प्रेमदिप थाम्सुहाङ लगायतले नवआगन्तुकहरुलाई स्वागत गर्नुभएको थियो ।
त्यस्तै शनिबार झापाको गौरादहमा विभिन्न पार्टी परित्याग गरेर २७ जना ससफो नेपालमा प्रवेश गरेका छन् । पार्टीका झापा जिल्ला सदस्य लक्ष्मी सुब्बाले दिएको जानकारी अनुसार उनीहरु काँग्रेस, एमाले लगायत पार्टी परित्याग गरेर ससफो नेपालमा प्रवेश गरेका हुन् ।