सन्देश सुब्बा/ २३ जेठ
पाँचथर/ विश्वमै लोपोन्मुख जङ्गली जनावरको सूचिमा रहेको सालकको लुकिछिपि चोरी शिकारी गर्ने क्रम बढ्दो अवस्थामा रहेको बेला पाँचथरका एक युवाले भने बाटोमा भेटेको सालक प्रहरीलाई खबर गरी जिम्मा दिएका छन् ।
जिल्लाको फालेलुङ गाउँपालिका–५, लुङमादिनका सन्दिप थाम्सुहाङले सोमबार साँझ बाटोमा भेटेको सालक प्रहरीलाई खबर गरी मंगलबार जिम्मा दिएका हुन् । सदरमुकाम फिदिमदेखि घर फर्किने क्रममा साँझ छ बजेतिर थाम्सुहाङले फालेलुङ गाउँपालिका–७, थोक्पनमा उक्त सालक भेटेका थिए ।
मानिस देखेपछि गोलो बनेर बाटोमै बसेको सालकलाई थाम्सुहाङले घरमा लगि प्राङ्बुङ प्रहरी चौकीमा खबर गरी जिम्मा दिएका हुन् । भाले जातको उक्त सालकलाई जिल्ला वन कार्यालय पाँचथर सँग परामर्श गरी जङ्गलमा छोड्ने वा के गर्ने भन्नेबारे निर्णय हुने प्रहरी चौकी प्राङबुङका असइ बल बहादुर श्रेष्ठले बताए ।
विश्वबाटै लोप भएर जान लागेको सालकको संरक्षण होस भने आफूले प्रहरीलाई खबर गरी जिम्मा दिएको थाम्सुहाङले बताए । सालकको खपटा महंगो मूल्यमा लुकिछिपि ब्यापारीले खरिद गर्ने गरेका कारण पूर्वी पहाडमा सालकको चोरी शिकारी गर्ने क्रम बढ्दो छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
