दमक, २१ जेठ ।
संघीय समाजवादी फोरम, नेपाल र नयाँ शक्ति पार्टी नेपालका संयुक्त उम्मेद्वारले आइतबारबाट झापाको दमक नगरपालिकामा चुनावी घरदैलो कार्यक्रमलाई व्यापकता दिएको छ ।
संयुक्त निर्वाचन परिचालन तथा प्रचार प्रसार समितिले आइतबारबाट चुनावी घरदैलो कार्यक्रम थालेको समितिका संयोजक कमन देवानले जानकारी दिनुभयो । आइतबारबाट असार १ गतेसम्मका लागि वडा केन्द्रित घरदैलो अभियान थालिएको देवानले बताउनुभयो । ‘हामीले मसाल चुनाव चिन्ह दमक नगरवासी जनतासम्म पुर्याउन र हाम्रा एजेण्डाहरुलाई जनतासम्म जानकारी दिन वडा केन्द्रित अभियान थालेका हौं’, उहाँले भन्नुभयो ।
प्रत्येक वडामा बिहान ७ बजेदेखि ११ बजेसम्म र दिउँसो ३ बजेदेखि साँझ ७ बजेसम्म दुई–दुई दिन चुनावी प्रचार हुने समितिले जनाएको छ । घरदैलो अभियान तालिका अनुसार जेठ २१ र २२ गते दमक ५, जेठ २३ र २४ गते दमक १, जेठ २५ र २६ गते दमक ८, जेठ २७ र २८ गते दमक ६, जेठ २९ र ३० गते दमक ७ र जेठ ३१ र असार १ गते दमक ३ मा घरदैलो कार्यक्रम सम्पन्न गरिने संघीय समाजवादी फोरमका झापा जिल्ला सचिव सुशीलकुमार राईले जानकारी दिनुभयो ।
आइतबारको चुनावी घरदैलोमा दुवै पार्टीका तर्फबाट संयुक्त मेयर पदका उम्मेद्वार सतिश साह, उपमेयरका उम्मेद्वार गंगा सागर शेर्मा, वडा नम्बर ५ का उम्मेद्वार राजु खड्का, वडा सदस्य पदका उम्मेद्वारहरु पुष्कर भट्टराई, उमा मगर लगायतले आफ्नो चुनावी प्रचार गरेका थिए ।
वडा नम्बर ७ का वडा अध्यक्ष उम्मेद्वार गजेन्द्र लावती, वडा नम्बर १ का वडा अध्यक्ष उम्मेद्वार ओममाया आङ्देम्बे, वडा नम्बर ६ का वडा अध्यक्ष उम्मेद्वार पुष्प न्यौपाने, वडा नम्बर ८ का वडा अध्यक्ष उम्मेद्वार उमेश गजमेर, वडा नम्बर ३ का वडा अध्यक्ष उम्मेद्वार डम्बर तिम्सिना लगायतले पनि एकीकृत घरदैलो अभियानका सघाउनुभएको थियो ।
एकीकृत घरदैलो कार्यक्रमले चुनावी प्रचार अभियान प्रभावकारी बनेको नयाँ शक्ति नेपालका प्रदेश नम्बर १ सदस्य योगेश उप्रेतीले बताउनुभयो । दुई पार्टीका नेता–कार्यकर्ताबीच चुनावी प्रचार अभियानले अन्तरघुलनको अवसर मिलेको उप्रेतीको भनाइ छ ।
दुवै पार्टीले संयुक्त चुनावी तयारीका साथ दमक नगरपालिकाको विभिन्न १० मध्ये ६ वटा वडाहरुमा वडा अध्यक्ष, वडा सदस्यसहित मेयर र उपमेयरमा उम्मेद्वारी तय गरेर चुनावी प्रचारमा जुटेको हो । झापाका अन्य नगरपालिका र गाउँपालिकाहरुमा भने दुई पार्टीबीच तालमेल हुन सकेको छैन । दुवै पार्टीले दमक १, ५ र ७ वडामा आफ्ना उम्मेद्वार दावेदार भएको बताएका छन् । वडा ६, ८ र ३ मा भने प्रतिस्पर्धात्मक स्थिति रहने बताइएको छ ।
ससफो र नयाँ शक्तिले मोरङको उर्लाबारी र पथरी शनिश्चरे नगरपालिका निर्वाचनमा पनि संयुक्त चुनावी कार्यक्रम अघि बढाएको ससफो नेपाल लिम्बुवान प्रदेश समितिका प्रचार विभाग प्रमुख प्रेम वनेमले जानकारी दिनुभएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
