धनकुटा, २० जेठ ।
संघीय समाजवादी फोरम नेपालका उपाध्यक्ष रकम चेम्जोङले संविधानमा कायम रहेका विभेदकारी धाराहरु आफूहरुलाई मान्य नहुने जिकिर गर्नुभएको छ ।
स्थानीय तहको निर्वाचनका लागि गृह जिल्ला धनकुटामा रहनुभएका उपाध्यक्ष चेम्जोङले हाल निर्वाचनमा सहभागी हुनुको अर्थ संविधान पूर्ण रुपमा स्वीकारिएको हो भन्नु गलत हुने बताउनुभएको हो ।
चेम्जोङले भन्नुभयो –‘संविधानमा विभेदकारी धाराहरुमा हाम्रो विमति कायमै छ ।’ उहाँले भन्नुभयो –‘निर्वाचन लोकतन्त्र अभ्यासको माध्यम भएकाले असन्तुष्टिका बीच पार्टी निर्वाचनमा सहभागी भएको हो ।’
स्थानीय निर्वाचनमा सहभागी हुँदैमा पहिचान, संघीयता र अधिकारको मुद्दा नछाडिएको दावी गर्दै चेम्जोङले भन्नुभयो –‘निर्वाचनलाई आन्दोलनकै रूपमा उपयोग गरिएको हो ।’
चुनावसँग जोडेर ससफोलाई कमजोर पार्ने दुष्प्रयास भएको भन्दै उहाँले  सुनियोजित षड्यन्त्रपूर्ण तवरले गरिएको प्रचारबाजी सफल नुहने जिकिर गर्नुभयो ।
स्थानीय तहको निर्वाचनमा सहभागी हुनुलाई नै विभेदकारी संविधान स्वीकार गरेको आरोप लगाइए पनि आफूहरु उत्पीडित जनाताका मुद्दामा स्पष्ट रहेको उहाँले दावी गर्नुभयो ।
।

पूर्वमा एमाले हराउने प्रयास

पूर्वी नेपालको पहाडी जिल्लाहरूका धेरैजसो गाउँपालिका, नगरपालिकाहरूमा संघीय समाजवादी फोरम, नेपाली काँग्रेस, माओवादी केन्द्र, नयाँ शक्ति पार्टीबीच चुनावी तालमेल गरिएको उपाध्यक्ष चेम्जोङले दावी गर्नुभएको छ ।
स्थानीय तहको दोस्रो चरणको निर्वाचनलाई लक्षित गरी भोजपुरका सबैजसो पालिकाहरूमा र ताप्लेजुङ, पाँचथरमा केही पालिकाहरूमा गठबन्धन गरिएको उहाँले जानकारी दिनुभयो । बाँकी पालिकाहरूमा पनि गठबन्धनका लागि छलफल भइरहेको जनाइएको छ ।
निर्वाचनमा भाग लिइसकेपछि जित्नका लागि गठबन्धन गरिएको समेत चेम्जोङले जिकिर गर्नुभयो –‘एमाले इतरका दलहरूको गठबन्धनले पहिचान पक्षधर जनताहरू उत्साहित छन् ।’
देशको आर्थिक अवस्था दयनीय बनाउन ठूला भनिएका दलहरू नै बाधक भएको आरोप लगाउँदै उहाँले अबका दिनमा पहिचान पक्षधर शक्तिले मात्रै नेपालको विकास र समृद्धिलाई उचाईमा पुर्याउने बताउनुभयो ।