आगामी असार १४ गते हुने दोस्रो चरणको स्थानीय तहको निर्वाचनमा पूर्वको ताप्लेजुङदेखि सुदूरपश्चिमको कञ्चनपुरसम्मका ९० लाख ९७ हजार ५५७ मतदातालाई आफ्ना जनप्रतिनिधि चयनका गर्ने मताधिकार रहेको छ ।
मुलुकका १, २, ५ र ७ नं प्रदेशका ४३ जिल्लाका १२ उपमहानगरपालिका, १५६ नगरपालिका र २९३ गाउँपालिका गरी ४६१ स्थानीय तहको निर्वाचनका लागि छ हजार ७१८ मतदान केन्द्र र ११ हजार ९३१ कायम रहेको छ ।
यसैबीच सरकारले विराटनगर र वीरगन्जलाई महानगरपालिका घोषणा गरे पनि निर्वाचन आयोगले भने कसरी निर्वाचन गराउँछ, स्पष्ट हुन बाँकी छ । निर्वाचनका लागि निर्वाचन आयोगले आगामी असार २ गते उम्मेदवारी दर्ता र उम्मेदवार दर्ता भएको सूची प्रकाशन तथा असार ३ गते उम्मेदवारको विरोधमा उजुरी दिने र मनोनयन जाँच गर्ने कार्यक्रम सार्वजनिक गरिसकेको छ ।
दोस्रो चरणको निर्वाचनका लागि सबैभन्दा बढी मतदाता मोरङमा पाँच लाख ६३ हजार ८७० छन् । सबैभन्दा कम मतदाता तेह्रथुममा ६० हजार ७०४ छ ।
दोस्रो चरणको निर्वाचनमा सबैभन्दा बढी मोरङ, सप्तरी, सिरहा, धनुषा, सर्लाहीमा १७ – १७ स्थानीय तह तथा सबैभन्दा थोरै तेह्रथुम र अर्घाखाँचीमा छ–छ स्थानीय तह छन् ।
आयोगले असार ५ गते उम्मेदवारलाई निर्वाचन चिह्न प्रदान गर्ने र असार १४ गते बुधवार बिहान ७ देखि अपरान्ह ५ बजेसम्म मतदान गर्ने गरी निर्वाचन कार्यक्रम सार्वजनिक गरेको छ ।
उक्त निर्वाचनमा सबैभन्दा बढी मोरङमा ६६९, झापामा ६३७, रुपन्देहीमा ५४३, धनुषामा ५३५ सर्लाहीमा ५०१ र कैलालीमा ४९० मतदान केन्द्र कायम गरिएको छ । निर्वाचन आयोगका अनुसार तेह्रथुममा सवैभन्दा थोरै ८० मतदान केन्द्र रहेको छ ।
मतदाताको हिसाबले १ नं प्रदेशका १३७ स्थानीय तहमा सबैभन्दा बढी २६ लाख ७४ हजार ५६३ तथा सबैभन्दा थोरै ७ नं प्रदेशका ८८ स्थानीय तहमा १३ लाख ३ हजार ७१४ मतदाता रहेको जानकारी आयोगले दिएको छ ।
त्यसैगरी २ नं प्रदेशका १२७ स्थानीय तहमा २६ लाख ६४ हजार ७९२ तथा प्रदेश नं ५ का १०९ स्थानीय तहमा २४ लाख ५४ हजार ४८८ मतदाताले दोस्रो चरणको निर्वाचनमा मतदान गर्दैछन् । रासस