दमक, १७ जेठ ।
झापाको कमल गाउँपालिकाका दुई जना पूर्व गाविस अध्यक्षहरुले आफ्नै पार्टी नेकपा एमालेले गरेको उम्मेद्वारी घोषणाको विरुद्धमा विज्ञप्ति जारी गरेर चुनौती दिएका छन् ।
आसन्न स्थानीय तहको निर्वाचनमा एमालेबाट भीम राईलाई गाउँपालिका अध्यक्ष पदको उम्मेदवार बनाउन माग गर्दै उनीहरुले पार्टीलाई यसअघि भएका गलत निर्णय सच्याउन चेतावनी दिएका हुन् । 
साविक लखनपुर गाविसका पूर्व गाविस अध्यक्ष भोजकुमार घिमीरे र तोपगाछी गाविसका पूर्व गाविस अध्यक्ष पदम पौडेलले मंगलबार संयुक्त विज्ञप्ति जारी गरि राईलाई अध्यक्षका उम्मेदवार बनाउन माग गरेका छन् । घिमिरे र पौडेल दुवैले ५४ को स्थानीय निर्वाचनमा एमालेका तर्फबाट उम्मेद्वार हुँदै उल्लेखनीय मत पाएर गाविस अध्यक्ष निर्वाचित भएका थिए ।
यसअघि पार्टीले कमल गाउँपालिकाको अध्यक्ष पदमा अखिल नेपाल महिला संघकी केन्द्रीय सचिव मेनुका काफ्लेलाई उम्मेद्वार घोषणा गरेर पुनः नाम फिर्ता लिएपछि दुवै पूर्व गाविस अध्यक्षहरुले पार्टीको रवैयाविरुद्ध विज्ञप्ति जारी गरेर असमति प्रकट गरेका हुन् ।
काफ्लेको नाम फिर्ता गरेर पार्टीले गलत गरेको भन्दै घिमिरे र पौडेलले अब रिक्त अध्यक्ष पदमा राईलाई उम्मेद्वार वनाउन पार्टी नेतृत्वसँग विज्ञप्तिमार्फत चेतावनी दिएका हुन् । उनीहरुले काफ्लेलाई महिला भएकै कारण पूर्वाग्रही ढंगले उम्मेद्वार हुनबाट बञ्चित गराएको भन्दै पार्टीको चर्को आलोचना गरेका हुन् ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
