दमक, १६ जेठ ।
संघीय समाजवादी फोरम नेपाल र नयाँ शक्ति पार्टी नेपालले झापाको दमकमा चुनाव प्रचार प्रसार अभियानलाई तीव्रता दिएका छन् ।
संयुक्त निर्वाचन परिचालन तथा प्रचार प्रसार समितिको अगुवाईमा सोमबार गणतन्त्र दिवसको अवसर पारेर दमकमा घरदैलो कार्यक्रम सुरु गरिएको संयोजक कमन देवानले जानकारी दिनुभयो ।
सोमबार दमक–७, ६, ५ र १ वडाहरुमा बृहत् घरदैलो अभियान सञ्चालगन गरी मंगलबारदेखि वडा केन्द्रित घरदैलो कार्यक्रम थालिएको निर्वाचन परिचालन समितिले जनाएको छ । समितिका सह–संयोजक अशोक घिमिरे क्षेत्रीले निर्वाचन प्रचारका लागि आवश्यक साम्रगी तयारी र वितरणलाई पनि तीव्रता दिइएको हो । दमकमा दुवै पार्टीले वडा नम्बर १, ५ र ७ नम्बरमा सम्पर्क कार्यालयसमेत स्थापना गरी व्यवस्थित काम थालेका छन् ।
ससफो झापाका सचिव सुशीलकुमार राईले दमकमा दुवै पार्टीले संयुक्त उम्मेद्वारी घोषणासहित घरदैलो कार्यक्रम थालनी गरेर चुनावी माहोल ल्याइएको दावी गर्नुभयो । झापाभर चुनावी माहोल बन्दै गएको भन्दै राईले पार्टीले निर्वाचनलाई आन्दोलनका रूपमा उपयोग गर्ने नीति लिएको स्पष्ट पार्नुभयो ।
यस्तै झापाको मेची नगर र भद्रपुर नगरपालिकामा उम्मेद्वारी घोषणासहित प्रचारात्मक कार्य अघि बढाइएको पार्टी स्रोतले जनाएको छ । कमल गाउँपालिकामा उम्मेद्वारी चयनलाई अन्तिम चरणमा पुर्याइएको पार्टीका लिम्बुवान प्रदेश समिति सदस्य दिपेन बाला राईले बताउनुभयो ।
ससफो नेपाल र नयाँ शक्तिले दमकमा मेयर पदका लागि सतिष साह र उपमेयर पदमा गंगा सागर शेर्मा (राई) लाई उम्मेद्वार बनाएको हो । वडा नम्बर १ मा ओममाया आङ्देम्बे, वडा नम्बर ३ मा डम्बर तिम्सिना, वडा नम्बर ५ मा राजु खड्का, वडा नम्बर ६ मा पुष्प न्यौपाने, वडा नम्बर ७ मा गजेन्द्र लावती, वडा नम्बर ८ मा उमेश गजमेर, वडा नम्बर १० मा खगेन्द्र न्यौपानेलाई उम्मेद्वार बनाउने घोषणा गरिसकेको छ । दुवै पार्टीले यसअघि जेठ १० गते नै दमकमा पत्रकार सम्मेलन गरेर उम्मेद्वारी घोषणा गरेको थियो । दुवै पार्टीका संयुक्त उम्मेद्वारहरुले हातले समातेको मसाल चुनाव चिन्हमा मतदान गरी आफूहरुलाई विजयी गराउन आह्वान गरेका हुन् ।
वडा अन्तर्गत वडा नम्बर १ मा महिला सदस्यतर्फ कृष्णकुमारी अधिकारी (कल्पना), दलित महिला सदस्यमा कल्पना धमला, खुल्ला सदस्यहरुमा कुमार राई र पञ्चमाया लिम्बूलाई उम्मेद्वार तोकिएको छ । त्यस्तै ३ मा गंगाप्रसाद दुलाल र नरेन्द्रकुमार शेर्मा खुल्ला सदस्य पदका उम्मेद्वार रहेका छन् ।
वडा नम्बर ५ मा महिला सदस्यतर्फ उमा मगर, खुल्ला सदस्यतर्फ देउमान साम्रा र पुष्कर पोखरेलको नाम उम्मेद्वारका रूपमा अघि आएको छ । वडा नम्बर ७ मा महिला सदस्यमा विष्णुमाया चेम्जोङ (कल्पना), दलित महिला सदस्य पदमा लक्ष्मी सार्कीको नाम उम्मेद्वारका रूपमा रहेको छ भने खुल्ला सदस्य पदमा महेन्द्रकुमार योङ्हाङ र सन्तोष राईको नाम उम्मेद्वारका रूपमा प्रस्तावित छ ।
वडा नम्बर १, ५ र ७ मा चुनावी घरदैलो कार्यक्रमलाई व्यापक बनाइएको उम्मेद्वारहरुले बताएका छन् । अन्य वडाहरुमा पनि मनोनयन अवधिसम्ममा उम्मेद्वार तय गरि निर्वाचनका गतिविधि अघि बढाइने पार्टी सम्बद्ध स्रोतले जनाएको छ । दमक नगरपालिका कार्यालयमा सोमबार नै निर्वाचन आयोगले आफ्नो कार्यालय स्थापना गरेर काम थालेको निर्वाचन अधिकृत वेदनिधि फुयालले जानकारी दिनुभएको छ ।
दमकमा नेपाली काँग्रेस, नेकपा एमाले, माओवादी केन्द्र, राप्रपाले पनि चुनावी अभियानलाई व्यापकता दिएको बताएका छन् ।