काठमाडौँ, ९ जेठ ।
लगातार स्थगन गर्दै समय तालिका फेरबदल भइरहँदा मंगलबारको व्यवस्थापिका–संसद् बैठक अनिश्चित बन्दै गएको हो ।
मंगलबार बिहान ११ बजे डाकिएको बैठक प्रमुख तीन दलका शीर्ष नेताबीच छलफल गर्नुपर्ने भन्दै १ बजेका लागि सारिएको थियो । त्यसलगत्तै मन्त्रिपरिषद् बैठक बस्यो । तीन बजेका लागि संसद् बैठक सारियो ।
तर, प्रमुख दलहरुबीच संसद् चलाउने विषयमा सहमति हुन नसकेपछि संसद् सचिवालयले एकपछि अर्को गर्दै बैठक सरेको हो । सचिवालयले पुनः साँझ ५ बजेका लागि बैठक सरेको जानकारी दिएको भए पनि यो समाचार तयार पार्दासम्म संसद् बैठक सुरु भएको छैन ।
संसद्मा बजेट अधिवेशन अन्तर्गत आज सरकारको नीति तथा कार्यक्रम बारे छलफल गर्ने कार्यतालिका रहेको थियो । त्यस्तै आजै प्रधानमन्त्री पुष्पकमल दाहाल प्रचण्डले संसद् बैठकलाई विशेष सम्बोधन गरेर पदबाट राजीनामा दिने तय भएको थियो ।
तर, प्रुमख दलको बैठकमा प्रतिपक्षी एमालेले सरकार परिवर्तनको खेल रोक्ने भन्दै प्रधानमन्त्री प्रचण्डलाई संसद्मा बोल्नै नदिनका लागि अवरोध गर्ने तयारी गरेपछि दलीय सहमति खोज्न शीर्ष नेताहरु पटक–पटक बैठक बसिरहेका छन् । बैठकमा एमाले अध्यक्ष ओलीले काँग्रेस सभापति देउवालाई पदका लागि मरिहत्ते गरेको भन्दै आलोचना गरेको बताइएको छ ।
प्रचण्डको राजीनामापछि देउवा नेतृत्वमा नयाँ सरकार गठन हुने पक्कापक्की जस्तै छ । एमाले भने स्थानीय निर्वाचन सम्पन्न नभएसम्म प्रचण्ड सरकार नै रहनुपर्छ भन्ने मान्यतामा छ । तर, माओवादी केन्द्रले भने देउवा नेतृत्वको सरकार गठनका लागि मार्ग प्रसस्त गर्न प्रचण्डले राजीनामा गर्नुपर्ने निर्णयमा अडिग छ ।
दलीय खिच्चातानीले बजेट अधिवेशन प्रभावित हुनुका साथै संविधान संशोधनको सवाल र दोस्रो चरणको निर्वाचनको सन्दर्भ ओझेलमा परेको देखिन्छ । चुनाव हुने वा नहुने भन्ने अन्योलता अरु बढेर जाने संकेत छ ।