नयाँ सरकारमा अनुहार सामेल गर्न काँग्रेसी नेतादेखि गच्छदारदेखि थापासम्मको ध्याउन्न

कमन देवान
दमक, ९ जेठ ।
पार्टीभित्रैबाट सरकार छाड्न दबाव बढेपछि अहिले केही बेरमा प्रधानमन्त्री पुष्पकमल दाहाल प्रचण्डले पदबाट राजीनामा दिने हुनुभएको छ ।
सोमबारको माओवादी केन्द्र हेडक्वार्टर बैठकमा प्रधानमन्त्री एवम् पार्टी अध्यक्ष प्रचण्डलाई तुरुन्त सरकार हस्तान्तरणका लागि दबाव दिइएको थियो । प्रचण्डले मंगलबार आजको संसद् बैठकलाई विशेष सम्बोधन गर्दै राजीनामाको घोषणा गर्नुहुने छ ।
बालुवाटार सचिवालयका अनुसार प्रचण्डले दिउँसो १ बजेको संसद् बैठकबाटै राजीनामा दिनुहुने छ । तर। जेठ १५ गतेको काम चलाउ बजेट भने उहाँकै नेतृत्वमा रहने काम चलाउ सरकारले ल्याउने छ । सोमबारदेखि संसद्मा सुरु भएको बजेट अधिवेशन अनुसार १५ गतेभित्र बजेट ल्याउने पर्ने कानुनी प्रावधानका कारण पनि कामचलाउ सरकारकै भागमो त्यति अन्तिम गतिविधि पर्ने पक्का छ ।
१० महिना अघि नै सत्ता साझेदार नेपाली काँग्रेस र माओवादी केन्द्रबीच चेत महिनामा स्थानीय तहको निर्वाचन सकेर सत्ता हस्तान्तरण गर्ने सहमति भएको थियो ।
माओवादीभित्र अहिलेको अवस्थामा काँग्रेसलाई तत्काल सत्ता नसुम्पने हो भने राजनीतिक बेइमानी गरेको ठहर्ने र यसले स्थानीय तहको दोस्रो चरणमा हुने निर्वाचनमा गम्भीर असर पुग्ने भन्दै माओवादी शीर्ष नेताहरुले प्रचण्डलाई राजीनामाका लागि बाध्य पारेका स्रोतको दावी छ ।
आज प्रधानमन्त्री प्रचण्डले राजीनामा दिएपछि लगत्तै नयाँ सरकार गठनको प्रक्रिया सुरू हुने स्रोतहरुले जनाएका छन् । उता काँग्रेसभित्र भने तत्काल निर्वाचनको गुण दोषको जिम्मा लिनु भन्दा पनि प्रचण्ड नेतृत्वको सरकारले नै दोस्रो चरण निर्वाचन सम्पन्न गर्नुपर्ने र त्यसपछि मात्रै सत्ताको बागडोर जिम्मा लिनु बुद्धिमानी हुने सुझाव काँग्रेस शीर्ष नेताहरुले सभापति शेरबहादुर देउवालाई नदिएका भने होइनन् ।
तर, सत्ता नेतृत्वका लागि पानी बिनाको माछो झैं छटपटी खेपिरहेका सभापति देउवा भने आज भए आजै र भोलि भए भोलि नै प्रधानमन्त्रीका रूपमा पुनः सिंहदरबार र बालुवाटारमा आफ्नो फोटो झुण्ड्याउन आतुर रहेको स्रोतको दावी छ ।
सत्ता नेतृत्व भन्दा पनि काँग्रेसले स्थानीय निर्वाचनमा आफूलाई अब्बल स्थापित गर्दै आगामी प्रदेश र संघीय संसद्को निर्वाचनमा छलाङ्ग मार्नुपर्ने काँग्रेसी मध्यममार्गी नेताहरुको आग्रहलाई सुने नसुने झैं गर्दै देउवाले भने सरकारको नेतृत्व बाहेक अरु देख्न र सुन्नै नचाहेको स्रोतको भनाइ छ ।
वर्तमान अवस्थामा प्रचण्ड नेतृत्वकै सरकारले दोस्रो चरणको निर्वाचन गराए आफूहरुलाई फाइदा पुग्ने आँकलन प्रतिपक्षी दल एमालेको छ । एमालेले पटक–पटक प्रचण्डलाई तत्कालै राजीनामा नदिने सुझाउँदै आएको छ । नैतिक रूपले मधेसी दलहरुको मागलाई सम्बोधन गर्दै संविधान संशोधन गराउन नसकेर प्रचण्ड आलोचित बन्नु परेको अवस्थालाई पनि सदुपयोग गर्ने एमालेको दाऊ छ । त्यसो गर्दा मधेसमा आफ्नो गुमेको साख बचाउन थोरै भए पनि मद्दत पुग्ने ठहर एमालेको रहेको पार्टी निकट स्रोतले जनाएको छ ।
विभिन्न राजनीतिक आँकलनबीच प्रचण्ड सरकार ढल्ने पक्कापक्की भएपछि विशेषतः काँग्रेसभित्र नयाँ मन्त्रिमण्डलमा आफ्नो अनुहार कसरी अँटाउन सकिन्छ भन्ने बारे व्यापक कसरत सुरु भएको बताइन्छ । त्यस्तै नयाँ सरकारमा आफ्नो सिट सुरक्षित गर्न विजय गच्छदार जस्ता सत्ताका प्ले मेकरहरुलाई पनि निद हराम भइसकेको स्रोतको दावी छ । नयाँ सरकारमा मरिहत्ते गर्ने भन्दा पनि माओवादी केन्द्रमा भने पार्टीको खुम्चँदो आकारलाई कसरी फुकाउने ? भन्ने विषयमा बढी नै चिन्ता र वहस केन्द्रित भएको स्रोत बताउँछ ।
कँग्रेस नेतृत्वको सरकारमा आफ्नो उपस्थिति कसरी बलियो बनाउने ? भन्ने चिन्ताले सत्ताका अर्का खेलाडी कमल थापालाई पनि निक्कै पिरोलेको बताइएको छ । राप्रपाबाट प्रयाजसो मन्त्री भइरहने दीपक बोहरा, विक्रम पाण्डे, सुनिल थापा लगायतका नेताहरुले नयाँ बन्ने सरकारमा आफूहरुको स्थान कहाँनेर भनेर खोजी गर्न राजनीतिक पहलकदमी थालेको स्रोतको भनाइ छ ।