दमक, ४ जेठ ।
नेपाल आदिवासी जनजाति महासंघ दमक नगर समन्वय परिषद्को विशेष अधिवेशन आगामी असार ९ गते सम्पन्न गर्ने तय भएको छ ।
बिहीबार झापाको दमकस्थित किरात भवनमा बसेको विभिन्न जातीय संस्थाका अध्यक्षहरुसहितको विशेष भेलाले असार ९ गते विशेष अधिवेशन गर्ने निर्णय गरेको हो । नेपाल आदिवासी जनजाति महासंघका केन्द्रीय महासचिव नित्यानन्द ताजपुरियाको उपस्थितिमा बसेको भेलाले अधिवेशन मिति तय गरेको महासंघ झापाका प्रचार विभाग प्रमुख कमन देवानले जानकारी दिनुभयो ।
महासंघ दमक नगरमा तीन वर्षअघि भएको अधिवेशनबाट वासुदेव राई नेतृत्वको समिति चयन भएको थियो । तर, अध्यक्षमा पुनः दोहोरिन मोहन धिमाल समूहले अर्को महासंघ गठन गरेपछि दुई वटा समिति बन्दा दमकको आदिवासी जनजाति महासंघ विवादमा फसेको थियो । जिल्ला महासंघले राई नेतृत्वको समितिलाई आधिकारिताकता दिएको थियो भने त्यसको केही महिनापछि महासंघको तत्कालीन केन्द्रीय सचिवालयले धिमाल नेतृत्वको समितिलाई वैधानिक भनेको थियो ।
विवादका कारण दुवै समितिलाई दमक नगरपालिका कार्यालय लगायत सरकारी र अन्य निकायहरुले मिलेर आउन आग्रह गरेका थिए । विवादकै कारण महासंघले बिगत तीन वर्षदेखि नगरपालिकाबाट प्राप्त हुँदैआएको बजेटसमेत फ्रिज हुँदै आएको थियो ।
महासंघको केन्द्रमा नयाँ समिति आएपछि दमकको विवाद सुल्झाउन पहलकदमी थालिएको महासंघका महासचिव ताजपुरियाले बताउनुभएको छ । यसअघि दाङ जिल्लामा पनि सोही प्रकृतिको विवाद रहेकोमा महासंघ केन्द्रको सक्रियतामा समस्या समाधान गरिएको ताजपुरियाले बताउनुभयो ।
दमकको विगतको सबै विवाद भूलेर नयाँ शिराबाट अघि बढ्दै आदिवासी आन्दोलन र पहिचानको आन्दोलन रक्षाका निम्ति एक ढिक्का हुन उहाँले जातीय संस्थाका अध्यक्षहरुलाई आग्रह समेत गर्नुभयो । विशेष अधिवेशन तयारीका लागि आवश्यक पत्रचार र समन्वय गर्न धिमाल जातीय विकास केन्द्रका अध्यक्ष तेजबहादुर धिमाललाई आग्रह गरिएको महासचिव ताजपुरियाले बताउनुभयो । भेलामा विभिन्न १५ बढी जातीय संस्थाका अध्यक्ष एवम् प्रतिनिधिहरुको सहभागिता रहेको थियो ।