पथरी, ४ जेठ ।
मोरङको पथरीशनिश्चरे—३ स्थित एक सामुदायिक भवनमा एमाले प्रवेश गरेर ‘अपवित्र’ भएको भन्दै स्थानीय युवाहरुको एक समूहले झाँक्री लगाएर चोख्याएका छन् ।
वडा नम्बर ३ मा एमालेले डम्बर चेम्जोङलाई वडा अध्यक्षको उमेद्वार उठाएको छ । वडा नम्बर ३ स्थित वनेम टोलमा रहेको विद्युतको नयाँ सामुदायिक भवनमा आइतबार एमालेले उमेद्वार चेम्जोङ, २ नम्बर क्षेत्रका सांसद चण्डीप्रसाद राई लगायतको उपस्थितिमा चुनावी भेला गरेका थिए ।
एमाले प्रवेश गरेर भवन र टोल नै ‘अपवित्र’ भएको भन्दै सविन चेम्जोङ नेतृत्वको युवा समूहले सोमबार सो भवनमा झाँक्री लगाएर चोख्याएका हुन् । करिव ५० जनाको संख्यामा रहेका स्थानीयवासीले झाँक्री दलबहादुर सुन्दासलाई बोलाएर चोख्याउने कार्यक्रम राखेका थिए ।
झाँक्री सुन्दासले ढ्याङ्ग्रो बजाएर तितेपाती छर्किनुका साथै भलायोको चौक चार सुरमा गाडेर चोख्याएको स्थानीय मबिन्द्र नाल्बो लिम्बूले जानकारी दिनुभयो । चोख्याइसकेपछि उक्त स्थलमा चुनावी कार्यक्रम भएको थियो ।
कार्यक्रममा आगामि जेठ ३१ गते हुने स्थानीय तहको निर्वाचनमा वडा नम्बर ३ का स्वतन्त्र अध्यक्षका उमेद्वार विकास मगर, संघीय समाजवादी फोरमका स्थानीय नेता गोविन्द वनेम, नयाँ शक्ति नेपालका पथरीशनिश्चरे नगरका मेयरका उमेद्वार देवराज भण्डारी, माओवादी केन्द्रका स्थानीय नेता सन्तोष लिम्बू, लिम्बुवानका राज पयाङ्गु, भीमल मगर लगायतले बोलेका थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
