दमक, ३ जेठ ।
प्लटिङवालाको जग्गा स्रेस्ता मिलाएवापत घुस लिँदालिँदै सोमबार पक्राउ परेका नापी कार्यालय दमकका एक कर्मचारीलाई छुटाउन प्लटिङ व्यवसायीहरु र जग्गा दलालहरुको चलखेल बढेको बताइएको छ ।
अख्तियार दुरुपयोग अनुसन्धान आयोगको कार्यालय इटहरीको टोलीले प्लटिङको जग्गामा नहर बढी भएको जग्गाको स्रेस्ता मिलाएवापत प्राप्त ६ लाख ८० हजार घुस रकमसहित सोमबार नापी कार्यालय दमकका सर्वेक्षक विनोदकुमार मण्डललाई पक्राउ गरेको थियो ।
सर्वेक्षक मण्डलले प्लटिङको जग्गामा नहर बढी भएका जग्गाको स्रेस्ता मिलाइदिए बापत मोटो रकम लिने गरेका खुल्न आएको छ । दमक र आसपासका महँगो मूल्यका जग्गाको नक्सा र स्रेस्ता मिलाउन उनले जग्गाको कूल मूल्यको तीन भागको एक भाग रकम कमिसनका रूपमा लिने गरेको नापी कार्यालय स्रोतले दावी गरेको छ । अख्तियार दुरुपयोग अनुसन्धान आयोगको कार्यालय इटहरीका डिएसपी रमेश बस्नेतले सोमबार मण्डललाई घुस रकमसहित उनकै कार्यकक्षबाट पक्राउ गरी आवश्यक अनुसन्धान थालिएको जानकारी दिनुभएको छ ।
मण्डललाई सोमबार दिउँसोको अख्तियारको टोलीले उनकै कार्यकक्षबाट रंगेहात पक्राउ गरेको थियो । मण्डल अख्तियारको हिरासतमा पुगेपछि उनीमाथि छानविन सुरु भएको अख्तियार स्रोतले जनाएको छ । स्रोतका अनुसार हाल उनलाई छुटाउन दमकका केही प्लटिङ व्यवसायी पनि मोटो रकमको आश्वासनसहित अख्तियार पुग्ने गरेको बताइएको छ ।
हाल अख्तियारको हिरासतमा रहेका मण्डललाई छुटाउने चलखेल भइरहेको भन्दै माओवादी केन्द्र दमकका नेता याम पाठकले बुधबार दमकमा पत्रकार सम्मेलन गरेर खबरदारी गरेको बताउनुभएको छ । पाठकले दोषी कर्मचारीमाथि कडा कारबाही हुनुपर्ने माग गर्नुभएको छ । तर, मण्डललाई छुटाउन को को अख्तियार पुगेका थिए भन्ने बारे भने पत्रकार सम्मेलनमा खुलाइएन ।