दमक, २ जेठ ।
संघीय समाजवादी फोरम नेपाल लिम्बुवान प्रदेश समितिले दोस्रो चरणमा हुने स्थानीय तह निर्वाचनका लागि आवश्यक तयारी थालेको छ ।
ससफो नेपाल लिम्बुवान समितिको वैशाख २९ गते दमकमा सम्पन्न सातौं पूर्ण बैठकले निर्वाचनका लागि आवश्यक तयारी थाल्न जिल्लाहरुलाई निर्देशन दिएको हो । निर्वाचन सफल बनाउन ससफो लिम्बुवान समितिका अध्यक्ष आरसी तुम्बाको संयोजकत्वमा ‘लिम्बुवान प्रदेशस्तरीय निर्वाचन परिचालन समिति’ गठन गर्ने निर्णय भएको मुख्य सचिव लोकसागर साम्बाले जानकारी दिनुभएको छ ।
साम्बाका अनुसार जिल्ला तहमा तत्कालै निर्वाचन परिचालन समिति गठन गरेर काम थाल्न निर्देशन दिइएको बताउनुभयो । उहाँका अनुसार निर्वाचनका लागि आवश्यक अन्य कार्य प्रदेश समितिको कार्य सम्पादन समितिले गर्नेछ ।
प्रदेश समिति बैठकले विभिन्न १३ जनालाई पार्टीको प्रदेश समिति सदस्यमा मनोनयन गरेको बताइएको छ । जसमा होम सुवेदी, नयन्द्रबहादुर लिम्बू, मिलनकुमार राई, दिपेन बाला राई, आकाश राई छन् । त्यस्तै प्रदेश समिति सदस्यमा मनोनित हुनेहरुमा समर राई, सर्मुद्दिन हक, पाण्डवलाल चौधरी, कृष्ण कटुवाल, कमल चाम्लिङ, लीलाबहादुर सुनुवार, नितेश सिंघक र चेतन आङ्देम्बे छन् ।
पार्टी केन्द्रले तय गरेको मापदण्ड अनुसार स्थानीय तह निर्वाचनका लागि विभिन्न पदहरुमा उम्मेद्वारी चयन हुने मुख्य सचिव साम्बाले बताउनुभयो । नयाँ शक्ति नेपालसँग चुनावी तालमेल कार्यका लागि आवश्यक तयारी थालिएको उहाँको भनाइ छ । बैठकले पार्टीको लिम्बुवान प्रदेश प्रचार विभाग प्रमुखमा प्रेम वनेमलाई चयन गरेको बताइएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
