विप्लव समूहले मतपेटिका जलाए, केहीबेर दोहोरो भीडन्त
काठमाडौं, ३१ वैशाख ।
कालिकोट जिल्लाको नरहरिनाथ गाउँपालिकास्थित नन्दादेवी माविमा मतदान सम्पन्न भएपछि मतपेटिका मतदान केन्द्रमा लैजाने क्रममा विप्लव नेतृत्वको नेपाल कम्युनिष्ट पार्टीका कार्यकर्ताले मतपेटिका लुटेर आगजनी गरेपछि गोली हानाहान भएको खबर छ ।
निर्वाचन सम्पन्न भएपछि मतपेटीका शिल गरेर निर्वाचन केन्द्रतर्फ लाने तयारी गर्दै गर्दा विप्लवका कार्यकर्ताले मतपत्रसहितको मतपेटिका जलाएको कालिकोटका प्रमुख जिल्ला अधिकारी गिरधारी सुवेदीले जानकारी दिनुभएको छ ।
कालिकोटका प्रजिअ सुवेदीले मतपेटिका जलाएको पुष्टि गर्नुभएको छ । सुवेदीका अनुसार सो स्थानमा केहीबेर दोहोरो भिडन्तसमेत भएको छ । प्रहरी स्रोतका अनुसार विप्लव समूहले मतपेटीका जलाएपछि मतदान अधिकृतसहितका सरकारी अधिकारीहरु भागेका थिए ।
विप्लवका केन्द्रीय सदस्य नरेन्द्र विश्वकर्माले सुरक्षामा खटिएको प्रहरी टोली निर्वाचन स्थलबाट भागेको र सेनासँग गोली हानाहान भएको जानकारी दिनुभएको थियो । घटना बारे थप जानकारी प्राप्त भएको छैन ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
