काठमाडौं, २८ वैशाख ।
निर्वाचन आयोगले आज बिहीबारदेखि मतदाता परिचय पत्र वितरण सुरु गरेको छ ।
यही वैशाख ३१ गते आइतबार हुने पहिलो चरणको स्थानीय तह निर्वाचनलाई लक्षित गरी निर्वाचन आयोगले प्रदेश नम्बर ३, ४ र ६ मा मतदाता परिचयपत्र वितरण सुरु गरेको छ ।
आयोगको पूर्व सूचनाअनुसार वैशाख २८ देखि ३० गतेसम्ममा सम्पूर्ण मतदाताहरुले मतदान केन्द्रमा खटिएका मतदान टोलीबाट आफ्नो मतदाता परिचयपत्र लिन सक्नुपर्ने छ ।
प्रदेश नम्बर ३, ४ र ६ का विभिन्न ३४ जिल्लाका २८३ स्थानीय तहका ६ हजार ६ सय ४२ मतदान केन्द्रमा मतदान अधिकृतको टोलीले बिहीबारदेखि शनिबारसम्म मतदाताको परिचयपत्र वितरण कार्यक्रम जारी राख्ने प्रमुख निर्वाचन आयुक्त अयोधिप्रसाद यादवले जानकारी दिनुभएको छ ।
पहिलो चरणको निर्वाचनमा ४९ लाख ५६ हजार ९ सय २५ मतदाताले आफ्नो मतदान केन्द्रमा गएर भोट दिने छन् । अहिले स्थानीयस्तरमा राजनीतिक दलहरुसँगको समन्वयमा धमाधम मतदानस्थल र मतदान केन्द्रको निर्माण कार्य जारी रहेको आयोगले जानकारी दिएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
