रुपन्देही, २६ वैशाख ।
संघीय समाजवादी फोरम नेपालले स्थानीय तहको निर्वाचनमा सहभागी हुने निर्णयसँगै राजनीतिक रूपमा उत्पन्न भ्रम चीर्न र भावी रणनीति तय गर्न तराई थरुहट समिति अन्तर्गत आठ जिल्लाका शीर्ष नेताहरुलाई वर्तमान राजनीतिक विषयमा मंगबार प्रशिक्षण दिएको छ ।
तराई थरुहट समितिको आयोजना भएको प्रशिक्षण कार्यक्रममा चितवनदेखि कञ्चनपुरसम्मका पार्टीका केन्द्रीय सदस्य, केन्द्रीय परिषद्, प्रदेश समिति सदस्य र जिल्ला अध्यक्षहरुको विशेष सहभागिता रहेको थियो ।
रुपन्देहीको लुम्बिनीमा मंगलबार आयोजित एक दिवसीय प्रशिक्षण गोष्ठीमा पार्टीका केन्द्रीय अध्यक्ष उपेन्द्र यादव, वरिष्ठ नेता अशोक राई, उपाध्यक्ष लालबाबु राउत र उपमहासचिव अभिषेकप्रताप शाह लागतयको उपस्थिति रहेको थियो । यसअघि सोमबार वीरगञ्ज र आइतबार सिरहाको लहानमा फोरम नेपालले प्रदेशस्तरीय प्रशिक्षत भेला सम्पन्न गरिसकेको छ ।
कार्यक्रममा राष्ट्रिय जनता पार्टी रुपन्देहीका जिल्ला सदस्य एवम् कमहरिया गाउँ पालिका पूर्व उपाध्यक्ष हरिकुमार चौधरी, रुपन्देही जिल्लाको क्षेत्र नं.७ का क्षेत्रीय सदस्य अशोक लोध पार्टी परित्याग गरी संघीय समाजवादी फोरम नेपालमा प्रवेश गरेका छन् ।
परिमार्जनसहित संविधान संशोधन गर्ने सर्तमा पहाड केन्द्रीत तीन वटा प्रदेशमा उम्मेद्वारी दिएर पहिलो चरणको निर्वाचनमा होमिएको फोरम नेपालले मधेसको मुटु मानिने लहानमा आयोजना गरेको शीर्ष बैठकलाई अत्यन्तै महत्व र चासोका साथ हेरिएको छ ।
फोरम नेपालले स्थानीय तहको निर्वाचन अन्तर्गत पहिलो चरणको चुनावका लागि पहाडमा उम्मेद्वारी दिएपछि त्यसको आवश्यकता, औचित्य र तयारीका लागि मधेस केन्द्रीय प्रशिक्षणको आयोजना गरेको बताइएको छ ।
पछिल्लो समय विकसित राजनीतिक परिस्थितिको सामना गर्न पार्टीलाई झन् सुदृढ, संगठित, चुस्तदुरुस्त र नेतृत्व पंक्तिलाई अझ प्रभावकारी ढंगले परिचालन गर्न शीर्ष नेताहरुको उपस्थितिमा प्रदेश स्तरिय प्रशिक्षण दिइएको पार्टी स्रोतले जनाएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
