६०० जना जेष्ठ नागरिकलाई सम्मान
विर्तामोड, २६ वैशाख ।
स्थानीय तहको निर्वाचन नजिकिँदै जाँदा झापामा प्रतिपक्षी दल एमालेले चुनावी प्रचारका नाउँमा विभिन्न गतिविधि त्रीव पारेको छ । एमाले मंगलबार झापाको अर्जुनधारा–५ स्थित एक मन्दिरमा कार्यक्रम गरी एकै वडाका ६ सय जना ज्येष्ठ नागरिकहरुलाई चुनावी प्रचारात्मक सम्मान गरेको हो ।
वैशाबाडीस्थित दुर्गा मन्दिर परिसरमा एमाले अर्जुनधारा ५ वडा कमिटिीले ज्येष्ठ नागरिकहरुलाई सम्मानपत्र र गाम्छा प्रदान गरेर सम्मान गरेको हो । कार्यक्रममा सम्मानित जेष्ठ नागरिकहरुलाई जुस र फलफूल समेत वितरण गरेको एमाले अजुृनधारा ५ का अध्यक्ष उमानाथ लम्सालले जानकारी दिनुभयो ।
सबैभन्दा ज्येष्ठ ९७ वर्षीय हरिदास चौधरी र ९१ वर्षीया पार्वता बरालसहित वडाभरका ६० वर्षदेखि ९७ वर्षका सबै जेष्ठ नागरिकहरुलाई सम्मान गरिएको एमालेले जनाएको हो ।
अखिल नेपाल किसान संघका केन्द्रीय उपाध्यक्ष देवी बरालको प्रमुख आतिथ्यमा सम्पन्न कार्यक्रममा झापा क्षेत्र नम्बर ४ का सांसद प्रेमबहादुर गिरी, एमालेका क्षेत्रीय अध्यक्ष हरि राना, अर्जुनधारा नगर अध्यक्ष प्रेमसागर सापकोटा लगायतको उपस्थिति रहेको थियो ।
उक्त अवसरमा आसन्न स्थानीय तह निर्वाचनका लागि एमालेको तर्फबाट अर्जुनधारा–५ का उम्मेदवारहरु वडाध्यक्षमा ध्यानबहादुर भारती, दलित महिला सदस्य रीता नेपाली, सदस्यमा रोहित चौधरी, खड्ग चौहान लगायतको नाम घोषणा र परिचय गराइएको थियो ।
कार्यक्रममा जेष्ठ नागरिकहरुलाई एमालेले मात्रै सम्मान र माया गर्ने भन्दै सहभागी नेताहरुले प्रभावित पर्ने प्रयास गरेका थिए । सो वडामा पाँच हजार मतदाता रहेको बताइएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
