काठमाडौं, २६ वैशाख ।
निर्वाचन आयोगले पहिलो चरणको स्थानीय तह निर्वाचनको मतगणना सम्बन्धित स्थानीय तहको केन्द्रमा नै गर्ने निर्णय गरेको छ ।
मतपेटिका जिल्ला सदरमुकाम लैजाँदा सुरक्षाका दृष्टिले जटिलता आउनसक्ने भन्दै निर्वाचन आयोगले सबै स्थानीय तह निर्वाचनको मत गणना स्थानीय तहको केन्द्रमा नै गर्ने तयारी भएको जानकारी दिएको हो ।
निर्वाचन आयोगका प्रवक्ता सूर्यप्रसाद शर्माले सञ्चारकर्मीहरुलाई दिनुभएको जानकारी अनुसार स्थानीय तह निर्वाचनअन्तर्गत पहिलो चरणमा वैशाख ३१ गते सम्पन्न हुने निर्वाचनपछि ‘२८३ वटै स्थानीय तहमा एकसाथ मतगणना हुन्छ । त्यसको अधिकार निर्वाचन अधिकृतको कार्यालयलाई दिइएको छ । मतगणना सम्बन्धमा आयोगले थप निर्णय गर्नुपर्दैन ।’
आयोगका अनुसार हरेक गाउँपालिकाको केन्द्रमा निर्वाचन अधिकृतको कार्यालय स्थापना गरिएकाले सोही कार्यालयमै हरेक वडा र तहको मतगणना हुनेछन् ।
मतगणना कहिलेबाट र कहाँ गर्ने भन्ने अधिकार निर्वाचन ऐनले नै निर्वाचन अधिकृतको कार्यालयलाई दिएको प्रवक्ता शर्माले जानकारी दिनुभयो । निर्वाचन अधिकृतको कार्यालयले स्थानीय राजनीतिक दलसँगको समझदारीमा मतगणना हुने स्थान तथा समय टुङ्गो लगाउने र त्यसबारे सूचना टाँसेर जानकारी दिने कानुनी व्यवस्था छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
