काठमाडौं, २४ वैशाख ।

संघीय समाजवादी फोरम, नेपालका अध्यक्ष एवम् संघीय गठबन्धनका संयोजक उपेन्द्र यादवले आफूलाई गठबन्धन संयोजकबाट हटाइएको भन्ने प्रचार निराधार र झुटा भएको टिप्पणी गर्नुभएको छ ।
यादवले आइतबार पार्टीका तर्फबाट प्रेस विज्ञिप्ति जारी गर्दै शनिबार संघीय गठबन्धनको बैठक बसरेर गरिएको निणैय भनी विभिन्न सञ्चार माध्यमहरुमा आएका खबर झुटो भएको बताउनुभएको हो । उहाँले गठबन्धनका नाउँमा शनिबार जारी जिज्ञप्तिप्रति आफ्नो गम्भीर ध्यानाकर्षण भएको विज्ञप्तिमार्फत जानकारी दिनुभएको हो ।
‘मिति २०७४ साल वैशाख २३ गते विभिन्न सञ्चार माध्यमहरुमा सङ्घीय गठबन्धनको नामबाट सम्प्रेषण भएको कथित प्रेस विज्ञप्तिप्रति मेरो र हाम्रो पार्टीको गम्भीर ध्यानाकर्षण भएको छ । सङ्घीय गठबन्धनका संयोजक म स्वयम् रहेको र मेरो सल्लाहमा उक्त दिन कुनै पनि बैठक आयोजना नभएको कुरा यहाँ अवगत गराउन चाहन्छु । संयोजक र प्रवक्ता प्रा.डा. ओम गुरुङ लगायत गठबन्धनका अधिकांश बहुमत सदस्यहरुलाई कुनै जानकारी नै नदिई व्यक्तिगत रुपमा आयोजना भएको कथित बैठक सङ्घीय गठबन्धनको बैठक हुनै सक्दैन । यादवले विज्ञप्तिमार्फत गठबन्धनको अवधारणा पत्रको मर्म, भावना र आचारसंहिता विपरीत बसेको भनिएको बैठकले संघीय गठबन्धनको बैठकको बैधानिकता प्राप्त गर्नै नसक्ने जिकिर गर्नुभएको छ । उहाँले गठबन्धनका नाउँमा प्रेसित समाचारहरु गठबन्धनको आधिकारिक निर्णय नभएर व्यक्तिगत निर्णयहरु मात्र भएको दावी गर्नुभएको छ ।
विज्ञप्तिमा ‘महन्थ ठाकुरको नामबाट आएको उक्त प्रेस विज्ञप्ति राजनीतिक झूठको खेतीका साथै राजनीतिक बेइमानी र निन्दनीय काम समेत हो । आदिवासी जनजाति, मधेशी, थारु, खस, शिल्पी, मुश्लिम, लगायत सम्पूर्ण उत्पीडित वर्ग र समुदायको हक अधिकारको निम्ति जारी सङ्घर्षलाई सफलतामा पुर्याउन अरु बृहत्तर एकीकृत शक्ति निर्माण गर्नुपर्ने वर्तमान राजनीतिक परिस्थितिमा यसरी घात अन्तर्घात गर्ने कार्य अत्यन्तै लज्जास्पद मात्र नभएर खेदजनक पनि छ’ भनिएको छ ।
उत्पीडित वर्ग, जाति र समुदायको मुक्तिको निम्ति लामो सङ्घर्ष आवश्यक रहेको भन्दै यादवले परिवर्तित राजनीतिक परिस्थिति अनुसार सबैले मिलेर अघि बढ्नुपर्ने सुझाउनु भएको छ । उहाँले आफ्नो पार्टी नेपाली जनताको मुक्तिको निम्ति सदैव क्रियाशील र संघर्षशील रहेको भन्दै कसैसँग आत्मसमर्पण नगरिने जिकिर गर्नुभएको छ । यादवले गठबन्धनका आगामी कार्यभारहरु पूरा गर्न सबै घटक सदस्य संगठनका नेताहरुलाई एकीकृत भई छलफलमा सहभागी हुन आग्रह गर्नुभएको छ ।

मधेसमा ससफोको विशेष प्रशिक्षण

यस्तै आइतबार नै यादवले पार्टीको तराई मधेस प्रदेशस्तरीय गोष्ठीलाई सम्बनेधन संविधान संशोधनमार्फत जनताका अधिकार सुनिश्चित गराउन स्थानीय चुनावलाई आन्दोलनकै रूपमा उपयोग गरिने बताउनुभएको छ ।
सिरहाको लहानमा सम्पन्न गोष्ठीमा उहाँले पार्टीको संगठन पहाडमा पनि रहेकाले देशैभर चुनावमा सहभागी हुन वैशाख ३१ को प्रदेश नम्बर ३, ४ र ६ नम्बर प्रदेशमा हुने निर्वाचनमा उम्मेद्वारी दिइएको जिकिर गर्नुभयो ।
गोष्ठीमा ससफो नेपालको तराई मधेस प्रदेश अन्तर्गत पर्सादेखि झापासम्मका पार्टीका केन्द्रीय सदस्य, केन्द्रीय परिषद् र जिल्ला अध्यक्षहरुको विशेष सहभागिता रहेको थियो ।
गोष्ठीमा अध्यक्ष यादवसहित पार्टीका वरिष्ठ नेता अशोक राई, उपाध्यक्षहरु युवराज कार्की, रेणु यादव, लालबाबु राउत र केन्द्रीय कोषाध्यक्ष एवं पूर्वमन्त्री विजय यादवले प्रशिक्षणात्मक निर्देशन दिनुभएको बताइएको छ ।