काठमाडौं, २२ वैशाख ।
प्रधानमन्त्री पुष्पकमल दाहाल ‘प्रचण्ड’सँग नेपालका लागि हंगेरियन राजदूत ग्युला पेथोले शुक्रबार बिहान भेट गर्नुभएको छ ।
प्रधानमन्त्री निवास बालुवाटारमा भएको भेटमा दुईपक्षीय, विकास र समसामयिक राजनीतिक परिस्थितिका विषयमा कुराकानी भएको प्रधानमन्त्रीको निजी सचिवालयले जनाएको छ ।
भेटमा प्रधानमन्त्री प्रचण्डले विश्व विकासको बहुआयमिक सम्भावनातिर लम्किरहेको र नेपालले पनि राजनीतिक स्थिरता, विकास र समृद्धिको मार्ग पछ्याइरहेको बताउनुभएको थियो ।
प्रम निजी सचिवालयका अनुसार प्रधानमन्त्री प्रचण्डले ‘नेपालमा लगानीका निम्ति अनुकूल वातावरण बनिरहेको छ, आर्थिक वृद्धिदर विगतको तुलनामा उत्साहवद्र्धक छ, राजनीतिक स्थिरताको वातावरण बनिरहेको’ बारे प्रष्ट्याउनुभएको थियो ।
भेटमा प्रचण्डले राजदूत पेथोलाई नेपाल सरकारले घोषणा गरेको स्थानीय तह निर्वाचनमा सम्पूर्ण पार्टीहरु होमिएको जानकारी दिनुभएको थियो । प्रधानमन्त्रीले निर्वाचनले जनतामा ठूलो उत्साह पैदा गरेको र एकैचोटी हजारौं जनप्रतिनिधिहरु निर्वाचित भएर आउँदा राजनीतिक स्थिरता र विकासले गति लिने बताउनु भएको थियो ।
भेटका अवसरमा राजदूत पेथोले पछिल्लो समयमा नेपालले हासिल गरेको आर्थिक प्रगतिप्रति खुसी व्यक्त गर्दै नेपालको विकास र राजनीतिक स्थिरताका लागि हंगेरियाको सधैं सहयोग र सद्भाव रहने बताउनु भएको सचिवालय स्रोतले जनाएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
