अपडेट
काठमाडौं, २२ वैशाख ।
नेकपा एमालेका सांसद्हरुको अवरोधका कारण व्यवस्थापिका संसद्मा सुरु हुन लागेको प्रधानन्यायाधीश सुशीला कार्कीमाथिको महाअभियोग प्रस्ताव बारेको छलफल रोकिएको छ ।
शुक्रबार दोस्रो पटक बसेको संसद् बैठकमा प्रधानन्यायाधीश कार्कीविरुद्ध दर्ता भएको महाअभियोग प्रस्तावमाथि छलफल गर्ने कार्यसूची अनुसार बैठक सुरु भएलगत्तै एमाले सांसदहरुले नाराबाजी गरेका थिए ।
सभामुख ओनसरी घर्तीमगरले महाअभियोग प्रस्तावका प्रस्तावक मीन विश्वकर्मालाई प्रस्ताव पेश गर्न समय दिनुभएको थियो । तर सांसद विश्वकर्मालाई एमाले सांसदहरुले रोष्टम पुग्नै दिएनन् ।
प्रतिपक्षी एमालेले नेतृत्व गरेको अन्य साना दलका सांसदहरुले पनि शुक्रबारको संसद् बैठक अवरुद्ध पार्न नाराबाजीमा सहभागी भएका थिए । विपक्षी सांसदहरुको लगातारको नाराबाजीपछि संसद् बैठक आइतबारसम्मका लागि स्थगित भएको छ ।
यसअघि शुक्रबारको पहिलो बैठकमा एमालेका सांसदहरुको नाराबाजी चलिरहेका बेला महाअभियोग प्रस्तावमाथि छलफलका लागि समय तोकिएको थियो ।
स्वेच्छाचारी कदम चालेको भन्दै प्रधानन्यायाधीश कार्कीविरुद्ध वैशाख १७ गते संसद्मा महाअभियोग दर्ता भएको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
