शैक्षिक संस्थाहरु एक साताका लागि बन्द

काठमाडौं, २१ वैशाख । सरकारले पहिलो चरणमा स्थानीय तहको निर्वाचन हुने तीन वटै प्रदेशमा लागू हुने गरी वैशाख ३१ गते सार्वजनिक विदा दिने निर्णय गरेको छ । विहीबार बसेको मन्त्रिपरिषद् बैठकले निर्वाचन आयोगको सिफारिस अनुसार मतदानको दिन बैशाख ३१ गते सार्वजनिक विदा दिने निर्णय गरेको हो ।
त्यस्तै वैशाख २५ गतेदेखि ३१ गतेसम्म पहिलो चरणको चुनाव हुने जिल्लाहरुमा सबै शैक्षिक संस्थाहरुमा विदा दिने निर्णय गरेको मन्त्रिपरिषद् स्रोतले जनाएको छ ।
स्थानीय तहको निर्वाचन अन्तरगत पहिलो चरणका लागि प्रदेश नम्बर ३, ४ र ६ का विभिन्न २ सय ८३ स्थानीय निकायमा उम्मेद्वारी दिनेको संख्या ४९ हजार २ सय ७ रहेको छ ।
निर्वाचन आयोगले दिएको तथ्यांक अनुसार नगरपालिका तथा गाँउपलिका प्रमुख तथा अध्यक्षमा १९ सय २५, उपप्रमुख तथा उपाध्यक्षमा १४ सय १९, वडाध्यक्षमा १० हजार ८ सय ४१ ले उम्मेद्वारी प्रस्तुत गरेका छन् ।
तीन प्रदेशका विभिन्न स्थानीय तहका वडा सदस्य पदका लागि १८ हजार ३ सय ७१, महिला सदस्यमा ९ हजार ३३, र दलित महिला सदस्यमा ७ हजार ४ सय ७२ जनाको उम्मेदवारी परेको आयोगले जनाएको छ ।

कुन जिल्लामा कति उम्मेद्वार ?

देशको राजधानी काठमाडौं महानगरपालिकासहित काठमाडौं जिल्लामा सर्वाधिक ३ हजार ५ सय ६ जनाको उम्मेदवारी परेको छ भने कम जनसंख्या रहेको मनाङ जिल्लामा २ सय ३३ जनाको उम्मेद्वारी परेको छ ।
त्यस्तै काभ्रेप्लानचोक जिल्लामा २७ सय ५१, कालिकोटमा १७ सय ३९, कास्कीमा १५ सय ४९, गोरखामा १९ सय ३८, चितवनमा ११ सय ३३, जाजरकोटमा १३ सय १२ जनाको उम्मेदवारी परेको छ ।
यस्तै जुम्लामा १२ सय १७, डोल्पामा ६ सय ६३, तनहुँमा १५ सय ८३, दैलेखमा १९ सय १७, दोलखामा १२ सय ८१ को उम्मेदवारी परेको आयोगको तथ्यांकमा उल्लेख छ ।
धादिङ जिल्लामा २ हजार ६१, नवलपरासीमा १७ सय ३१, नुवाकोटमा १९ सय १५, पर्वतमा १ हजार ९२, बाग्लुङमा १४ सय ७०, भत्तपुरमा १ हजार १२, मकवानपुरमा १८ सय १५, मनाङमा २ सय ३३, मुगुमा ५ सय ९७, मुस्ताङमा २ सय ३८, म्याग्दीमा ६ सय १७, रसुवामा ५ सय ६८, रामेछापमा १ हजार ७६ को उम्मेदवारी परेको छ ।
आयोगका अनुसार रुकुममा ११ सय ९६, लमजुङमा १ हजार ४३, ललितपुरमा १५ सय ९३, सल्यानमा १५ सय २९, सिन्धुपाल्चोकमा १९ सय १०, सिन्धुलीमा १३ सय ७, सुर्खेतमा २ हजार ५७, स्याङ्जामा १६ सय ७६, र हुम्लामा ७ सय १० जनाले उम्मेद्वारी दिएका हुन् ।