भने– संविधान कार्यान्वयन, संशोधन र स्थानीय चुनाव मुख्य

काठमाडौं, २१ वैशाख ।
उपप्रधानमन्त्री एवम् गृहमन्त्री पदबाट राजीनामा दिनुभएका विमलेन्द्र निधीले आफ्ना लागि संविधान कार्यान्वयन, संशोधन र स्थानीय निर्वाचन प्रमुख मुद्दा भएकाले मुलुकको परिस्थितिलाई विश्लेषण गर्दै पाँच दिनअघि पदबाट दिएको राजीनामा फिर्ता लिएको बताउनुभएको छ ।
गृहमन्त्री निधिले भन्नुभयो –‘अहिलेको अवस्थामा संविधान कार्यान्वयनका लागि संशोधन आवश्यक छ । जनतालाई नयाँ संविधानप्रति विश्वस्त पार्न स्थानीय तहको निर्वाचन चाहिएको छ । त्यसैले मैले यी महत्वपूर्ण कार्यभार पूरा गर्न आफ्नो पछिल्लो अघिल्लो निर्णय फिर्ता लिएको हुँ ।’
राजीनामा फिर्ता लिएको केहीबेरमा जनकपुर विमानस्थलमा ओर्लिएपछि सञ्चारकर्मीहरुसँगको कुराकानीमा गृहमन्त्री निधीले मुख्य कार्यभार आफ्नो लागि विशेष भएको प्रतिक्रिया दिनुभएको थियो । यसअघि बिहीबार नै बालुवाटारमा उहाँले प्रधानमन्त्री पुष्पकमल दाहाल प्रचण्ड र नेपाली काँग्रेसका सभापति शेरबहादुर देउवासँग भेटघाट गर्नुभएको थियो । निधिले भन्नुभयो –‘उहाँहरुको आग्रहमा राजीनामा फिर्ता लिएको हुँ ।’
गत आइतबार निधिले सरकारले आफूसँग कुनै सरसल्लाह नगरी प्रधानन्यायाधीश सुशीला कार्कीमाथि महाअभियोग लगाइएको विषयलाई कारण देखाउँदै राजीनामा दिनुभएको थियो । आफूले पदबाट राजीनामा दिएको विषयलाई लिएर मधेसी मोर्चामा आबद्ध दलहरुले समेत चिन्ता व्यक्त गरेको निधिको भनाई थियो । मधेसको माग सम्बोधनका लागि पनि मधेसी नेताहरुले आफूलाई नै गृहमन्त्रीका रूपमा हेर्न चाहेको उहाँको जिकिर थियो ।