मोर्चाको औचित्य समाप्त : राजपा
काठमाडौ, १९ वैशाख ।
दोस्रो संविधानसभा निर्वाचनपछि संविधानमा मधेसका मुद्दा समेट्नलाई दबाव दिन बनेको संयुक्त लोकतान्त्रिक मधेसी मोर्चा मंगलबारबाट औपचारिक रुपमा भंग भएको छ । मोर्चामा आवद्ध विभिन्न ६ वटा दलले राष्ट्रिय जनता पार्टी नेपाल नामक पार्टी दर्ता गरेसँगै मोर्चा भंग भएको घोषणा गरेको हो ।
संयुक्त लोकतान्त्रिक मोर्चामा आवद्ध उपेन्द्र यादव नेतृत्वको संघीय समाजवादी फोरम वैशाख ३१ को निर्वाचनमा सहभागी भएको आरोप लगाउँदै राजपाले मोर्चा टुटेको घोषणा गरेको हो ।
राजपाले संघीय समाजवादी फोरम नेपालबाट मोर्चालाई धोका भएको निष्कर्षसहित औचित्य समाप्त भएको घोषणा गरेको हो । मधेशवादी छ वटा दलले मंगलबार बैठक बसेर फोरम अध्यक्ष उपेन्द्र यादवको आलोचना गर्दै मोर्चा टुटेको जनाएको हो । बैठकमा राजपा नेताहरुले पहिलो चरणको चुनावका लागि मंगलबार उम्मेद्वारी मनोनयन गराएका फोरम नेपालको चर्काे आलोचना गरेका छन् ।
राजपा नेपाल अध्यक्ष मण्डलका सदस्य राजकिशोर यादवले उपेन्द्र यादवले मधेसी मोर्चालाई मात्र होइन, सिगों मधेशलाई धोका दिएको आरोप लगाउनुभएको छ ।
सविधान संशोधन नभएसम्म राजपा नेपाल कुनै पनि हालतमा चुनाव नजाने भन्दै यादवले वैशाख २१ गते पनि संशोधन विधेयक पारित हुने सम्भावना नरहेको जिकिर गर्नुभयो ।
बैठकले सम्पूर्ण जिल्ला कमिटिलाई आआफ्नो जिल्लामा एकता भेला गरी एकीकरणलाई पूर्णता दिन निर्देशन दिएको छ । एक वर्षभित्रमा राजपा नेपालको महाधिवेशन हुने भएकाले त्यो अवधिमा सम्पूर्ण भातृ संगठन तथा जिल्ला, गाउँ, नगरको एकता भेला सम्पन्न गरिसक्नु पर्ने निर्णय बैठकले गरेको छ । साथै, निर्वाचन आयोगमा नयाँ पार्टी दर्ताका लागि प्रक्रिया पूरा गरी चाँडै दर्ता गराउने निर्णय पनि भएको राजपाका नेता केशव झाले जानकारी दिनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
