काठमाडौं, १९ वैशाख । स्थानीय तह निर्वाचन अन्तरगत पहिलो चरणको निर्वाचनका लागि मंगलबार प्रदेश नम्बर ३, ४ र ६ का विभिन्न ३४ जिल्लामा उम्मेदवारी दर्ता भइरहेको छ ।
विहान १० बजेबाट सुरु भएको उम्मेदवारी दर्ता प्रक्रिया साँझ ५ बजेसम्म चल्नेछ ।
प्रदेश नम्बर ३ मा सिन्धुली, रामेछाप, दोलखा, काभ्रेपलाञ्चोक, सिन्धुपाल्चोक, नुवाकोट, रसुवा, धादिङ, मकवानपुर, चितवन, काठमाडौं, ललितपुर र भक्तपुर समेत गरी १३ वटा जिल्ला समेटिएका छन् ।
त्यस्तै, प्रदेश नम्बर ४ मा गोरखा, लमजुङ, मनाङ, मुस्ताङ, म्याग्दी, बागलुङ, पर्वत, स्याङजा, तनहुँ, कास्की र नवलपरासीको केही भागसमेत गरी ११ वटा जिल्ला छन् ।
पहिलो चरणको निर्वाचन हुने प्रदेश नम्बर ६ मा हुम्ला, कालीकोट, डोल्पा, जुम्ला, दैलेख, मुगु, जाजरकोट, सुर्खेत, सल्यान र रुकुमको केही भाग गरी ११ जिल्लाहरु समेटिएका छन् ।
३ वटा प्रदेशका २ सय ८३ वटा स्थानीय तहमा पहिलो चरणको निर्वाचनका लागि उम्मेदवारी मनोनयन भइरहेको हो । सरकारले दोस्रो चरणको निर्वाचनका लागि २०७४ जेठ ३१ गते निर्वाचनको मिति तोकेको छ । दोस्रो चरणमा स्थानीय तहको संख्या थपघट नभए प्रदेश नम्बर १, २, ५ र ७ का विभिन्न ५ सय ६१ स्थानीय तहमा मनोनयन हुने छ । दोस्रो चरणको निर्वाचनका लागि मनोनयन दर्ता मिति तोकिसकिएको छैन ।

स्थानीय चुनावमा कुन उम्मेद्वारले कति खर्च गर्न पाउँछन् ?

स्थानीय तहको निर्वाचनका लागि निर्वाचन आयोगले विभिन्न पदमा उम्मेद्वारी दर्ता गर्ने उम्मेदवारहरूले अधिकत खर्च गर्न पाउने सीमा तोकेको छ ।
२०७३ फागुन २८ गते आयोगले स्थानीय तह निर्वाचनमा भाग लिने उम्मेद्वारहरुले निर्वाचन प्रचारप्रसारलगायतका अन्य कार्यमा खर्च गर्न पाउने विषयमा हद तोकेको थियो ।
आयोगले जिल्ला समन्वय समितिका प्रमुख र उपप्रमुख पदका उम्मेद्वारहरुलाई ३ लाख ५० हजार र जिल्ला समन्वय समिति सदस्य पदका उम्मेद्वारहरुलाई १ लाख ५० हजार सम्म खर्च गर्न पाउने सीमा तोकेको हो ।
महानगरपालिकाका प्रमुख र उपप्रमुख पदका उम्मेद्वारहरुले  ७ लाख ५० हजार खर्च गर्न पाउने छन् भने महानगरपालिकाका वडा अध्यक्ष र सदस्य पदका उम्मेद्वारहरुले ३ लाख सम्म खर्च गर्न पाउने छन् ।
त्यस्तै, उपमहानगरपालिकाको प्रमुख र उपप्रमुख पदका उम्मेद्वारहरुले ५ लाख ५० हजार र वडा अध्यक्ष र सदस्य पदका उम्मेद्वारहरुले २लाख ५० हजार चुनावमा खर्च गर्न पाउनेछन् ।
आयोगले तोकेको खर्च सीमा अनुसार नगरपालिकाका प्रमुख र उपप्रमुख पदका उम्मेद्वारले ४ लाख ५० हजार र वडा अध्यक्ष र सदस्य पदका उम्मेद्वारले २ लाख खर्च गर्न पाउने छन् । गाउँपालिका प्रमुख र उपप्रमुख पदका उम्मेद्वारले ३ लाख ५० हजार र वडाअध्यक्ष र सदस्य पदका उम्मेद्वारले १ लाख ५० हजार खर्च गर्न पाउनेछन् ।
उम्मेदवारले मतदाता नामावली खरिद, सवारी साधन र घोडा, सवारी इन्धन र दाना, प्रचारप्रसार सामग्री, ढुवानी, कार्यकर्ता परिचालन, कार्यालय सञ्चालनलगायतमा खर्च गर्न पाउनेछन् । निर्वाचन खर्च विवरण अनिवार्य निर्वाचन आयोगलाई पेश गर्नुपर्ने कानुनी प्रवधान रहेको छ ।