काठमाडौं । आमालाई नजिकबाट बुझेकी र आमालाई नजिकबाट स्याहारेकी बसन्ती थोक्लेङ आमाकै प्रेरणाश्रोतबाट गायिका बनेकी छिन् । माया ममताबाट करुण बन्ने मनबाट साहित्य फुरे, स्वर निखारिए । त्यही फुरेको साहित्य र खुलेको स्वरको साथमा नयाँ परिचय बनाउन ध्याउन्न छिन् ।
वि. सं. २०४४ सालमा पिता रामप्रसाद थोक्लेङ र माता मइतमाया थोक्लेङको कोखबाट कान्छी छोरीको रूपमा जन्मेकी बसन्ती लिम्बू (द्रोना)को जन्मथलो पाचथरको कुरुम्बाङ गाउँ हो । कुरुम्बाङ गाउँकै सिङ्हदेबी माबी (हाल उच्च माबी)बाट प्रारम्भिक शिक्षा सुरु गरेकी बसन्तीले श्री चिसोपानी उच्च माबी बाझो ५ इलामबाट एसएलसी उत्तीर्ण गरिन् । त्यसपछि पारिवारिक र ब्यबहारिक परिबन्धमा परेर अरु अध्ययन गर्न नसकेको उनको दुखेसो छ ।
बसन्ती सानैदेखि गीत गाउथिन्, स्कुलको अतिरिक्त प्रोग्राममा धेरै पटक गीत गाइन्, शिक्षक र साथीहरूले बसन्ती तिम्रो स्वर त धेरै राम्रो छ है भनेर भन्दा उनी फुरुङ्ग हुन्थिन् तर त्यतिबेला पछि गएर म गायिका नै हुन्छु भन्ने कहिले पनि नसोचेकी बताउछिन् । बसन्तीसँग सुमधुर स्वर त थियो नै त्यो स्वरलाई अझ निखार बनाउन चाहिँ बसन्तीको आमाको कारण बनेको बसन्ती सुनाउछिन् –“आमा क्यान्सरले ग्रस्त भएर चार बर्षसम्म भरतपुर क्यान्सर अस्पताल बस्नु भो, घरका आफूभन्दा जेठो दाजु दिदीहरूले खासै आमाको रेखदेखमा चासो चिन्ता देखाउनु भएन, म कान्छी छोरी सबैभन्दा सानू मैले सबै थोक त्याग्न सक्थे यहाँसम्म कि मेरो प्राण पनि तर मेरी आमा मेरो लागि सबथोक थिइन् त्यसैले म निरन्तर आमाको रेख्देखमा एक्लै भरतपुर कैयौँ महिना बसेँ, पाचथरदेखि कैयौँ पटक एक्लै भरतपुर आउने जाने गरे त्यतिबेला मन सारै भक्कानिन्थ्यो र कैयौँ पटक रुँदै–रुँदै अरुणा लामा, तारादेबी र नारायण गोपालको गीतहरू गाए, कविता/गजलहरू लेखेर धेरै कापीका पानाहरू सिध्याए, पछि आमा पनि बित्नु भो, त्यसपछि त झन म सम्हालिनै सकिनँ, र मेरो साहारा गीत नै बन्यो म मनको पीडा गीतमार्फत गुनगुनाएर ओकल्न थाले र गजल कविता लेखेर कापी पानाहरूमा पीडा पोख्न थाले, एक किसिमले म पागल जस्तै भएँ ।
मातृ बियोगमा जलेर घाँस दौरा मेलो पातहरूमा गीत गुनगुनाउदै हिड्न थालेकी बसन्तीको स्वर गायक कोमल निरौला, देवी गौतम, राजेश चाम्लिङ, सङ्गीतकार सुमन दियाली, सुरताल सङ्गीत स्कुलका गुरुहरूले सुने । उहाँहरूले तिम्रो स्वर धेरै राम्रो छ है भनेर हौसला दिन थाले अनि मेला र उत्सवतिर हुने ‘स्टेज प्रोग्राम’ तिर गाउन भनी उत्साहित गर्न थाले र बसन्तीले स्टेजप्रोग्रामहरूमा गीत गाउन थालिन् । अहिले त इलाम पाचथरतिरका स्टेज प्रोग्रामहरू बसन्तीबिना अधुरो हुने अवस्था छ ।
बसन्तीको गायन स्टेज प्रोग्राममा मात्र सिमित भएन, उनी आफ्नो कलालाई प्रस्तुत गर्न र केही सिक्न अनलाइनमा छिरिन् । त्यहाँ गीतकार अन्जान किरातीसँग भेट हुन पुग्यो र किरातीमार्फत धेरै सिक्ने मौका मिल्यो । पछि अनलाइन मै बसन्तीको मिल्ने साथी अशिम चाम्लिङमार्फत प्रतिभा परिवारका बरिष्ठ सदस्य गीतकार तथा सङ्गीतकार देबिनबाबू राईसँग भेट भयो, देबिनबाबूमार्फत प्रतिभा परिवारले एल्बम गरिरहेको र परिवारले विशेष त नयाँ प्रतिभालाई ब्रेक दिने निर्णय गरेको जानकारी पाइन्, बसन्तीले सोचिन् आफ्नो कला प्रस्तुत गर्ने सुन्दर प्लेटफर्म भनेको प्रतिभा परिवार नै हो, फलस्वरूप बसन्तीको अनुरोध र देबिनबाबू राईको प्रस्तावमा प्रतिभा परिवारको संयोजक राजरोबट अजनबीमार्फत उनी प्रतिभा परिवारमा छिरिन् ।

म कान्छी छोरी सबैभन्दा सानू मैले सबै थोक त्याग्न सक्थे यहाँसम्म कि मेरो प्राण पनि तर मेरी आमा मेरो लागि सबथोक थिइन् त्यसैले म निरन्तर आमाको रेख्देखमा एक्लै भरतपुर कैयौँ महिना बसेँ, पाचथरदेखि कैयौँ पटक एक्लै भरतपुर आउने जाने गरे त्यतिबेला मन सारै भक्कानिन्थ्यो र कैयौँ पटक रुँदै–रुँदै अरुणा लामा, तारादेबी र नारायण गोपालको गीतहरू गाए, कविता/गजलहरू लेखेर धेरै कापीका पानाहरू सिध्याए।

गायन करिअर मै पहिलोपल्ट गीत रेकर्ड गर्न प्रतिभा परिवारबाट ब्रेक पाएकी बसन्तीले प्रतिभा एल्बममा एउटा डुइट गीत गायक सङ्गीतकार सुमन राईसँग गाएकी छिन्, जुन गीत प्रतिभा परिवारको बरिष्ठ सदस्य गीतकार/साहित्यकार दिलिप राई सगरले लेख्नु भएको छ भने अर्का बरिष्ठ सदस्य सङ्गीतकार देबिनबाबू राईले सङ्गीत भरेका छन् । जुन गीत प्रतिभा एल्बम भाग १ मा समाबेस छ ।
प्रतिभा एल्बममा गीत गाइसके पछि गायक÷गायिका देबी गौतम र निर्मला चौहानसँग संयुक्त रूपमा अर्को गीत पनि रेकर्ड गर्ने अबसर पाइन्, अब अरु दुई गीत रेकर्डिङको तयारीमा रहेको बताउने बसन्तीलाई गायक राजेश पायल राईसँग गीत गाउन र तारा प्रकाश लिम्बूको सङ्गीतमा स्वर दिने चाहना पनि छ ।