बिर्तामोड, १८ वैशाख । झापाको विभिन्न सञ्चार गृहहरुमा कार्यरत पत्रकारहरुले अझै पनि सरकारले निर्धारण गरेको न्यूनतम पारिश्रमिक नै नपाएको गुनासो गरेका छन् । १२८ औं अन्तर्राष्ट्रिय श्रमिक दिवसको अवसरमा मिडिया कर्मचारी युनियन र नेपाल व्यापार कर्मचारी संघ झापाले सोमबार बिर्तामोडमा आयोजना गरेको ‘श्रमिकको न्यूनतम ज्यालाको अधिकार र सरोकारवालाको भूमिका’ विषयक अन्तरक्रिया कार्यक्रममा सहभागी पत्रकारहरुले यस्तो गुनासो गरेका हुन् । सरकारले तोकेको न्यूनतम पारिश्रमिक झापाका कुनै पनि सञ्चार गृहहरुले पत्रकारहरुलाई नदिएको र आपसी समझदारीमा काम गर्नुपरेको उनीहरुको भनाइ छ । नेपाल व्यापार कर्मचारी संघका केन्द्रीय अध्यक्ष गजेन्द्र पौडेलको प्रमुख आतिथ्यमा सम्पन्न अन्तरक्रियामा बोल्दै नेपाल पत्रकार महासंघ झापाका अध्यक्ष तारामणि सापकोटाले मोफसलमा रहेका सञ्चार गृहले पत्रकारलाई सञ्चार गृहकै अवस्था दर्बिलो नभएका कारण न्यूनतम पारिश्रमिक उपलब्ध गराउन नसकेको बताउनुभयो । सापकोटाले सञ्चार गृहको अवस्थाको विषयमा जानकारी लिँदै पत्रकारलाई न्यूनतम पारिश्रमिक उपलब्ध गराउन आग्रह गरिने बताउनुभयो । महासंघ झापाका पूर्व अध्यक्ष कृष्ण हुँमागाईले मोफोसलमा रहेका सञ्चार माध्ययमले कुनैपनि पत्रकारलाई न्यूनतम तलब समेत उपलब्ध गराउन नसकेको स्पष्ट पार्नुभयो । प्रेस चौतारी झापाका अध्यक्ष मुक्ति पौडेलले पत्रकारले न्यूनतम ज्याला समेत नपाएका करण आफ्नो न्यूनतम आवश्यकता पूरा गर्न एक सञ्चार गृहबाट अर्काे सञ्चार गृहमा काम गर्नु पर्ने बाध्यता रहेको छ बताउनुभयो । कार्यक्रममा साझा मञ्च डटकमका सम्पादक गोपाल काफ्लेले सरकारले तोकेको न्यूनतम पारिश्रमिक पत्रकारले नपाएका कारण यहाँका धेरै सञ्चारकर्मीले पोशाबाट पलायन हुनु परेको धारणा राख्नुभयो । कार्यक्रममा रेडियो विराटकी प्रबन्ध निर्देशक लीला अनमोल, पत्रकार रेजिना रोदन, उद्योग वाणिज्य संघ बिर्तामोडका अध्यक्ष बलराम कार्की, युनिकम नेपालका पूर्वाञ्चल कोअडिनेटर सचिन ढकाल लगायतले धारणा राखेका थिए । मिडिया कर्मचारी युनियन झापाका अध्यक्ष सुरेन्द्र भण्डारीको अध्यक्षतामा कार्यक्रम भएको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
