ठमाडौं, १९ वैशाख । सर्वोच्च अदालतकी प्रधानन्यायधीश सुशीला कार्कीविरुद्ध सरकारले व्यवस्थापिका संसद्मा दर्ता गरेको महाअभियोग प्रस्ताव असंवैधानिक कदम भएको संघीय समाजवादी फोरम नेपालका अध्यक्ष उपेन्द्र यादवले बताउनुभएको छ । ससफो नेपालका अध्यक्ष यादवले सोमबार विज्ञप्ति जारी गर्दै महाअभियोग प्रस्ताव संवैधानिक सर्वोच्चता र विधिको शासनमाथिको हमला भएको जिकिर गर्नुभएको हो । यादवबाट जारी विज्ञप्तिमा महाअभियोग ‘सुनियोजित हमला मात्र नभई सरकार (कार्यपालिका) ले स्वतन्त्र न्यायपालिकामाथि नियन्त्रण र सर्वोच्च अदालतको न्यायिक स्वतन्त्रतामाथिको ठाडो हस्तक्षेप गर्ने कार्य लोकतान्त्रिक गणतन्त्रात्मक प्रणालीको मूल्य र मान्यताका विपरीत रहेका छन्’ भनी उल्लेख छ । उहाँले सत्तामा रहेका व्यक्तिहरुले गैरकानूनी तरिकाबाट आफ्ना व्यक्तिगत, गुटगत र दलगत स्वार्थ परिपूर्ति गर्नका लागि राजकीय सत्ता र शक्तिको दुरुपयोग गरी स्वतन्त्र न्यायालयलाई प्रभाव पार्नु वा पार्न खोज्नु अत्यन्तै गैरलोकतान्त्रिक चरित्र र व्यवहार भएको विज्ञप्तिमार्फत जनाउनुभएको हो । यादवले महाअभियोग प्रस्ताव तत्काल फिर्ता लिई न्यायालयको स्वतन्त्रतालाई सम्मान गरिनु पर्ने भनी माग समेत गर्नुभएको छ ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
