काठमाडौं, १४ वैशाख ।
संघीय समाजवादी फोरम नेपालका अध्यक्ष उपेन्द्र यादवले स्थानीय तहको निर्वाचनमा ससफो नेपाल र नवगठित राष्ट्रिय जनता पार्टी नेपालबीच सहकार्य हुने बताउनुभएको छ ।
ससफो नेपाल देशभर चुनाव लड्न चाहेको भन्दै उनले १८ गतेभित्रै संविधान संशोधन हुनु पर्ने बताउनुभएको छ ।
बिहीबार राजधानीमा आयोजित एक कार्यक्रममा बोल्दै अध्यक्ष यादवले भन्नुभयो –‘हामीबीच चुनाव र संघर्ष दुवैमा सहकार्य हुन्छ, अरुसँग पनि तालमेल गर्न सकिन्छ ।’ यसअघि संघीय समाजवादी फोरम नेपाल र नयाँ शक्ति पार्टीबीच चुनावमा तालमेल गर्ने सहमति भइसकेको छ ।
संघीय गठबन्धनका संयोजक समेत रहनुभएका यादवले संसद्को प्रक्रियामा रहेको संविधान संशोधन विद्येयक १८ गतेभित्र पास हुनु पर्नेमा जोड दिनुभएको छ । उहाँले भन्नुभयो –‘सरकार, राजपा नेपाल र संघीय गठबन्धनबीच भद्र सहमति भएर नै यो संशोधन प्रस्ताव अगाडि बढाइएको हो, बैशाख १८ गतेभित्रै यसलाई संसद्बाट अनुमोदन गराउनुपर्छ र गर्न सकिन्छ ।’
यादवले संशोधन प्रस्ताव पारित नभए निर्वाचनमा भाग नलिने चेतावनी दिनुभयो । वातावरण सहजताका लागि आफूहरुले केही दिनलाईमात्रै संघर्षका कार्यक्रमहरु स्थगन गरेको भन्दै यादवले प्रस्ताव पारित नभए आन्दोलनमा जाने जिकिर गर्नुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
