चुलाचुली, १४ वैशाख ।
इलामको दक्षिणी चुलाचुली गाउँपालिका–३ यलम्बर चोकस्थित एक विपन्न परिवारलाई चुलाचुली प्रवासी सञ्जाल इलामले राहत वितरण गरेको छ ।
सञ्जालका अध्यक्ष बलराम गिरी र सचिव छत्र चाम्लिङसहितको समूहले स्थानीय मृतक वीरबहादुर राईको परिवारलाई राहत हस्तान्तरण गरेको हो । आर्थिक रूपले विपन्न वीरबहादुरको १७ दिन अघि छोपुवा बिरामका कारण मृत्यु भएको थियो ।
ज्याला मजदुरी गरेर परिवार पालिरहेका उनका श्रीमती र तीन छोरी छन् । मृतककी श्रीमती सुकमाया राईका अनुसार वीरबहादुरको मृत्युपछि तीन सन्तानलाई लालनपालन र विद्यालय भर्ना गर्न समस्या छ । मृतक वीरबहादुरको जीर्ण घर केही दिनअघि छिमेकीहरूले श्रमदान गरेर बनाइदिएका छन् ।
चेतनामूलक कार्यक्रम गर्ने उद्देश्य लिएको सञ्जालले पीडितलाई सामान्य सहयोग उपलब्ध गराएको समितिका अध्यक्ष गिरीले बताउनुभयो । तत्कालका लागि २० वाटको एक थान सोलार प्यानल, दुई थान ओड्ने–ओछ्याउने, आय आर्जन स्रोतका लागि एउटा सुँगुरको पाठो गरी २० हजार दुई सय बराबरको राहत वितरण गरिएको सञ्जालले जनाएको छ ।
विदेशमा रहेर श्रम गरिरहेका गाउँले युवाहरुको सहयोगमा सञ्जालले आर्थिक कोष खडा गरेको गिरीको भनाइ छ । चुलाचुली प्रवासी सञ्जालले कोषमा पाँच लाख रकम जम्मा गरेको सचिव चाम्लिङले जानकारी दिनुभयो । नौ सदस्यीय कार्य समिति रहेको सञ्जालमा ३० जना दाताहरूले १० हजार देखि ६० हजारसम्म सहयोग गर्दै आएका छन् ।
बुधबार राहत प्रदान गर्न स्थानीय सामाजिक अगुवाहरु मिना आङथुपो, नरेश माङमो, हेमन्त राई, तीलप्रसाद आङथुपो, देउमान थुलुङ, विजय राई लगायत सहभागी थिए ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
