काठमाडौं, १० वैशाख ।
प्रचण्ड नेतृत्वको सरकारले परिमार्जनसहित संविधान संशोधन प्रक्रिया अघि बढाउने सर्तमा मधेसी मोर्चा आवद्ध संघीय गठबन्धनले पूर्वघोषित आन्दोलनका कार्यक्रमहरु तत्कालका लागि स्थगन गर्ने निर्णय गरेको छ ।
सरकारले मन्त्रिपरिषद् बैठकबाट परिमार्जनसहित संविधान संशोधन गर्ने निर्णय गरेकोले आन्दोलनका कार्यक्रम स्थगत गरिएको संघीय समाजवादी फोरम नेपालका सहअध्यक्ष राजेन्द्र श्रेष्ठले जानकारी दिनुभयो ।
आइतबार दिउँसो मन्त्रिपरिषद् बैठकले शनिबार मोर्चासँग भएको सहमति अनुसार परिमार्जनसहित संंविधान संशोधन गर्ने निर्णय गरेपछि संघीय गठबन्धनले आन्दोलनका कार्यक्रमहरु तत्काललाई स्थगन गर्ने निर्णय गरेको हो ।
गत बैशाख ३ गते स्थानीय तह निर्वाचनलाई केन्द्रीत गरेर संघीय गठबन्धनले आन्दोलनमा देशभर मसाल जुलुस निकाल्नेदेखि अनिश्चितकालीन नेपाल बन्द गर्नेसम्मका चरणबद्ध आन्दोलन घोषणा गरेको थियो ।
काठमाडौंको तीनकुनेस्थित संघीय समाजवादी फोरम नेपालको मुख्यालयमा आइतबार बसेको गठबन्धनको बैठकले संविधान संशोधन विधेयक पारित नहुँदासम्मका लागि आन्दोलनका सम्पूर्ण कार्यक्रम स्थगित गर्ने निर्णय गरेको हो ।
‘भद्र सहमतिअनुसार सरकारले मन्त्रिपरिषदबाट गरेको निर्णय स्वागत योग्य छ’, बैठकपछि संघीय समाजवादी फोरम नेपालका सहअध्यक्ष राजेन्द्र श्रेष्ठले भन्नुभयो –‘संविधान संशोधन नहुँदासम्मका लागि सम्पूर्ण आन्दोलनका कार्यक्रम स्थगित भएका छन् ।’ आन्दोलन स्थगित मात्रै भएको भन्दै श्रेष्ठले फिर्ता भने नभएको जिकिर गर्नुभयो ।
सहमतिमा स्थानीय तहको निर्वाचन दुई चरणमा गर्ने र परिमार्जनसहित फास्ट ट्रयाकमा संशोधन प्रस्तावलाई अघि लैजाने भद्र समझदारी भएको थियो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
