विर्तामोड, ९ वैशाख ।
संघीय समाजवादी फोरम नेपालको निर्वाचित झापा जिल्ला समितिका सदस्यहरुलाई शनिबार सपथ ग्रहण गराइएको छ ।
समाजवादी फोरमका राजनीतिक समिति सदस्य प्रवीण नेम्बाङको प्रमुख आतिथ्यतामा सम्पन्न समारोहका बीच निर्वाचित ५७ जना जिल्ला सदस्यहरुलाई सपथ गराइएको हो । समारोहलाई सम्बोधन गर्दै नेम्बाङले अबको परिवर्तनकारी राजनीतिक आन्दोलनलाई समाजवादी फोरमले नेतृत्व गरिरहेको दावी गर्नुभयो । उहाँले झापाको पार्टी संगठनलाई आन्दोलनसँग जोडेर अघि बढ्न निर्देशन दिनुभयो ।
पार्टीको लिम्बुवान प्रदेश समिति उपाध्यक्ष देवेन्द्र राईले आन्दोलन नै पार्टीको जीवन भएकाले संगठित र अनुशासित भएर अघि बढ्न निर्वाचित समितिलाई आग्रह गर्नुभएको थियो ।
निर्वाचन समितिका सदस्य कमन देवानले झापा राजनीतिक रूपले अनेकन चुनौती र प्रसस्त सम्भावना बोकेको जिल्ला भएकाले साझा भावनाका साथ नयाँ समितिलाई काम गर्न सुझाव दिनुभएको थियो ।
झापाको विर्तामोडमा आयोजित सपथ ग्रहण समारोहका बीच गत चैत २० र २१ गते सम्पन्न अधिवेशनबाट निर्विरोध निर्वाचित जिल्ला सदस्यहरुलाई सपथ ग्रहण गराइएको निर्वाचन समितिका सदस्य सुरेश लावतीले जानकारी दिनुभयो ।
समारोहमा केन्द्रीय सदस्य लोकसागर साम्बा, लिम्बुवान प्रदेश समिति कोषाध्यक्ष केवलराम राई, सचिव सुमन शर्मा जमरकट्टेल, सचिवालय सदस्य पदमकुमारी राई (लिम्बू), समाजवादी महिला फोरमकी केन्द्रीय सदस्य गंगा मास्के लगायतको सहभागिता रहेको थियो ।
सपथ ग्रहणपछि प्रतिवद्धता व्यक्त गर्दै निर्वाचित अध्यक्ष धिरेन सुब्बा लावतीले जिल्ला पार्टीलाई संगठित र जुझारु ढंगले अघि बढाइने बताउनुभयो । लावतीले भने यसअघि चैत ३० गते नै सपथ लिइसक्नु भएको हो । अध्यक्ष पदका प्रत्यासी दिपेन बाला राईले निर्वाचित समितिलाई आफ्नो तर्फबाट पूर्ण साथ र सहयोग हुने बताउनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
